07 July, 2010

ရဟန်းနှင့် ရေနံ

(၁)
“ရေနံရှာနိုင်တဲ့ လူနှစ်ယောက်လိုချင်တယ်တဲ့၊ ရေနံရှာနိုင်တဲ့လူလို့ပြောတာနော်၊ အဖြူ အမဲမခွဲခြားဘူး။”

မြေပဲပါရဂူဟု ကျော်ကြားသည့် လူမဲပညာကျော်ဂျော့ခ်ဝါရှင်တန် ကာဗာက သည်စကားကိုပဲ တဖွဖွပြောနေတတ်ပါသည်။ ရေနံရှာဖွေပေးနိုင်မည့် လူနှစ်ယောက်လောက် လိုချင်သည်ဟု ကုမ္ပဏီကြီးတစ်ခုက မစ္စတာကာဗာထံ အပူကပ်နေသည်။ လူဖြူဖြစ်ရန်၊လူမဲဖြစ်ရန် သတ်မှတ်ချက်မရှိ၊ ဘွဲ့ရခြင်း မရခြင်းနှင့်လည်း မသက်ဆိုင်၊ ရေနံရှာဖွေပေးနိုင်မည့် လူနှစ်ယောက်။

(၂)
ရွှေပြည်ကြီးမှာ နေစဉ်က သူ့မှာ ကိုယ်ပိုင်စာအုပ်စင်လေးရှိသည်။ စာအုပ်စင်လေးကို ဖြည့်တင်းရန် ပန်းဆိုးတန်း ဂုံးတံတားကြီးကို ဖြတ်ကျော်မိတိုင်း သူ့စိတ်ကူးစိတ်သန်းများက သွက်လက်နေတတ်သည်။ စာအုပ်ငေးရသည့် အရသာက ဖြူလွလွရှိပါသည်။ ၀ယ်မည့်စာအုပ်ကို ပထမဆုံးသတ်သတ်မှတ်မှတ် ငွေးရှင်းကောင်တာကို ပို့ပြီးမှ မမြင်ဖူးသေးသည့် စာအုပ်များကို ဆက်ငေးသည်။ ငေးမိသော စာအုပ်ထဲမှ ကြိုက်နှစ်သက်သော စာအုပ်ကို မြည်းစမ်းဖတ်ရှုကာ နောက်တစ်ခါပန်းဆိုးတန်းခရီးစဉ်အတွက် တေးမှတ်လေ့ရှိသည်။ လက်လွန်ကာ စာအုပ်ပိုဝယ်မိလျှင် ဘတ်စ်ကားတိုး၍ ပြန်ရလေ့ရှိပါသည်။

ရဟန်းတစ်ပါးဖြစ်သော သူ့အတွက် စွဲလမ်းသိမ်းဆည်းတတ်သော အရာဆို၍ စာအုပ်များသာ ရှိသည်။ အခြားအရာများကိုတော့ သိမ်းပိုက်လေးလံလိုခြင်းမရှိတတ်။ သို့အတွက် သူ့ခရီးစဉ်များသည် အမြဲတမ်းပေါ့ပါး နေတတ်သည်။ ရန်ကုန်မှာ စာပေပို့ချနေစဉ်က သုံးလခန့် သူနှင့်အတူ လာရောက်နေထိုင်သော သူ့ဖခင်ကြီးသည် ထုပ်ပိုးသိမ်းဆည်းမှုမရှိသည့် ( စည်းကမ်းမရှိခြင်းဟုလည်း ထင်မြင်နိုင်စရာဖြစ်သည့်) သူ့ပိုင်ဆိုင်မှုများနှင့် ပတ်သက်၍ စိတ်ပျက်စွာ ညီးညူလေ့ရှိသည်။ “မောင်ပဇင်းက ရဟန်းဘ၀နဲ့ပဲ ကောင်းတယ်၊ လူ့ဘ၀မှာဆို စားစရာရှိမှာမဟုတ်ဘူး”တဲ့။

စာအုပ်များကိုတော့ သူတခုတ်တရသိမ်းဆည်းတတ်သေးသည်။ သို့သော် စာအုပ်များ မကြာခဏ ပျောက်ပျက်သောအခါ စိတ်ညစ်ရသည့် နာကျင်မှုဒဏ်ကို သူမခံစားနိုင်။ နောက်တော့ အခြားအရာများ ပျောက်ဆုံးသည်ထက် စာအုပ်ပျောက်ခြင်းက ဖြေဆည်ရာရှိသည်ဟု သူတွေးသည်။ ဖတ်သူတစ်ယောက် ယောက်လက်ထဲမှာတော့ ပျောက်သွားသော စာအုပ်လေး လင်းလင်းချင်းချင်းရှိနေပါလိမ့်မည်။ ထုပ်ပိုး စက္ကူမဖြစ်မချင်းပေါ့။

ရွှေပြည်ကြီးက ထွက်လာချိန်မှာတော့ သူ့စာအုပ်စင်လေးကိုပါ သံယောဇဉ်ဖြတ်လိုက်သည်။ ဖတ်ချင်ရင် ဖတ်၊ယူချင်ရင် ယူကြတော့။ ခု နောက်ပိုင်း ၀ယ်ဖြစ်သည့် စာအုပ်များကိုလည်း သိမ်းမထားတော့။ လက်မှတ်ပင် မထိုးဖြစ်၊ ဖတ်ပြီးလျှင် တစ်နေရာရာမှာ ထားပစ်ခဲ့တော့သည်။ ဥပါဒါန်တွေက အမြင်ကတ်စရာပဲ။


(၃)
ပျောက်သွားသော စာအုပ်များတွင် ဆရာဖေမြင့်၏ “မဟာကရုဏာရှင်များ” စာအုပ်လေးလည်း ပါဝင်သည်။ တိုးတက်ကြီးပွားလိုစိတ်နည်းပါးလှသည့် သူ့အတွက် ဆရာဖေမြင့်၏ တက်ကျမ်းများက အလုပ်မဖြစ်ပါ။ သို့သော် စိတ်ကို မြိမြအောင် သွေးဖို့၊ ငြိမ်းအောင် လောင်းဖို့အတွက်တော့ “နှလုံးသားအာဟာရ”လို “မဟာကရုဏာရှင်များ” လို စာအုပ်လေးများ လိုအပ်ပါသည်။


“မဟာကရုဏာရှင်များ” စာအုပ်က ကမ္ဘာမြေအတွက် ပေးဆပ်ကြသူများအကြောင်းကို ညွတ်နူးဖွယ် တင်ပြထားသည်။ သူထပ်တလဲလဲ ဖတ်ဖြစ်ခဲ့သော စာမျက်နှာများမှာ ဂျော့ခ်ဝါရှင်တန်ကာဗာ၏ နှလုံးသား လွင်ပြင်ပေါ်က ဖြူစင်ဝင်းမွတ်သော အရေးအကြောင်းများ ဖြစ်ပါသည်။ ငွေဝယ်ကျွန် လူမဲမိသားစုမှ နွမ်းပါးစုတ်ချာစွာ ကြီးပြင်းလာသော လူမဲကလေးတစ်ယောက်၏ အံ့မခန်းဖွယ် မြင့်မြတ်လှသော စိတ်နေ သဘောထားကို သူမင်သက်အားကျနေတတ်သည်။

လူမဲတစ်ယောက်အတွက် ပညာရေးအခွင့်အလမ်းနည်းပါးလှသော (လူဖြူများကြီးစိုးသည့် )ရပ်ဝန်းတွင် ပညာကျော်တစ်ယောက်ဖြစ်အောင် ကြိုးစားခဲ့သည့် မစ္စတာကာဗာ၏ မာနထက် အမျိုးမျိုး ရက်စက်နှိပ်ကွပ်လွန်းသည့် ပတ်ဝန်းကျင်နှင့် ကမ္ဘာမြေကို စိတ်မနာကျင်ဘဲ တစ်ခုခုပေးဆပ်ရန် အမြဲတွေးနေ တတ်သော မစ္စတာကာဗာ၏ နှလုံးသားကို အံ့သြလေးမြတ်မိတတ်သည်။ “ ကျွန်တော့်ကို အကူအညီပေးခဲ့တဲ့ အရေးအပါဆုံးအတွေးတစ်ခုကတော့ ကျွန်တော်ဘယ်တော့သေမလဲဆိုတဲ့ မေးခွန်းမဟုတ်ပါဘူး။ ကျွန်တော်မသေခင်မှာ ဘာတွေကို ဘယ်လို အကောင်းဆုံး ဖြစ်အောင် လုပ်သွားနိုင်မလဲ ဆိုတဲ့ အတွေးပါ” တဲ့။ ဗရာဗိုး.....။

မစ္စတာကာဗာအနေဖြင့် တပ်စကီဂီးစိုက်ပျိုးရေးကျောင်းစာသင်ခန်းလေးက ဘယ်မှ မခွာသော်လည်း ကမ္ဘာကြီးကတော့ မစ္စတာကာဗာ့ကို မြေပဲပါရဂူ၊ ရုက္ခဗေဒပညာရှင်၊ စိုက်ပျိုးရေးသုတေသီ၊ သိပ္ပံနှင့် နည်းပညာတီထွင်သူ၊ ပန်းချီဆရာ၊ ကျောင်းဆရာ။ စန္ဒရားအနုပညာရှင်စသော ဂုဏ်ထူးဝိသေသများဖြင့် ကြည်ညိုလေးစားကြရသည်။ နိုင်ငံခေါင်းဆောင်များကိုယ်တိုင် မစ္စတာကာဗာ၏ စာသင်ခန်းလေးဆီ ရောက်အောင်လာကာ ဂါရ၀ပြုရင်း အကြံဉာဏ်များတောင်းလေ့ရှိကြသည်။ မစ္စတာကာဗာ၏ နှလုံးသားတောက်ပမှုအရောင်ကြောင့် လူမဲတစ်ဦးထက် အနှိုင်းဆမဲ့ ပိုလွန်သော သူတော်စင်ကြီးဖြစ်သွားသည်။

မစ္စတာကာဗာ၏ စိတ်အစဉ်တွင် လူသည် လူသာဖြစ်သည်။ လူအချင်းချင်း ခွဲခြားဆက်ဆံဖွယ်မလို။ လူသားတစ်ယောက်၏ အရည်အချင်းအားလျော်စွာ ကမ္ဘာမြေကို အလုပ်အကျွေးပြုဖို့သာ ဖြစ်သည်။ လူဖြူမလို၊ လူမဲမလို။ ကမ္ဘာမြေကို စိုက်ပျိုးမည့် လက်များသာ လိုပေမည်။ မစ္စတာကာဗာကိုယ်တိုင်လည်း ကမ္ဘာမြေအတွက် တီထွင်ဆန်းသစ်မှုများစွာဖြင့် အလုပ်အကျွေးပြုခဲ့သည်။

ထို့ကြောင့်ပင် ကုမ္ပဏီကြီးတစ်ခုမှ ရေနံရှာပေးနိုင်မည့် လူနှစ်ယောက်လိုချင်သည်ဟု ပြောလာသောအခါ မစ္စတာကာဗာက စာသင်ခန်းထဲတွင် တပည့်ကျောင်းသားများကို တဖွဖွ ပြောနေသည်က “ ရေနံ ရှာပေးနိုင်တဲ့ လူနှစ်ယောက် လိုချင်တယ်”။

(၄)
ယခုနှစ် နွေဦးပေါက်ရာသီတွင် တပည့်ရဟန်းတော်လေးတစ်ပါးထံမှ မက်ဆေ့ခ်ျတစ်ခုကို သူ ဖတ်ရလေသည်။ နိုင်ငံခြားတက္ကသိုလ် တစ်ခုခု တက်ချင်သည်။ တက္ကသိုလ်ကလည်း အဆင့်မြင့်ရမည်။ သူ့လို ဘွဲ့တွေ အများကြီးလည်း ရချင်ပြန်သတဲ့။ အကြံဉာဏ်ပေးပါဦးတဲ့။ ဘာပညာတွေ သင်ချင်တယ်၊ ဘာလုပ်ချင်တယ် ဆိုသော ရည်ရွယ်ချက်နှင့် ပန်းတိုင်တော့ မပါ။ သို့နှင့် သူက မက်ဆေ့ခ်ျတိုတိုလေးပြန်ပို့လိုက်ရသည်။ “ရေနံရှာမှာလား”။


ဟုတ်ပါ့။ သူ့ကိုယ်တိုင်တောင် “ ရေနံ ရှာနိုင်ပြီလား ” မသေချာလို့ ရပြီးသားဘွဲ့တွေ ပြန်ခေါက် သိမ်းထားရသေး။ အော် ရေနံရှာဖို့ မစဉ်းစားဘဲ ဘွဲ့ရဖို့နဲ့ နိုင်ငံခြားတက္ကသိုလ်ကျောင်းထွက်ဖြစ်ဖို့ စဉ်းစားနေတဲ့ ခေါက်ရိုးကျိုးအတွေးများ......။

ဓမ္မဂင်္ဂါ
၀၈-၀၇-၂၀၁၀

1 comment:

ashin kusalasami said...

တပည့်တော်ဆီ စီးဝင်လာတဲ့ ဦးဂင်္ဂါရဲ့ မက်ဆေ့လေးအတွက် ကျေးဇူးတင်ပါတယ်။ အရှင့်ရဲ့ အရေးအသားတွေကို အမြဲတမ်း အားကျနေသူပါ။ စီဘောက်စ်မရှိတော့ ခြေရာတော့ မကျန်ခဲ့ဘူးပေါ့။ နှလုံးသားအာဟာရနဲ့ မဟာကရုဏာရှင်များ၊ ဂျော့ဝါရှင်တန်ကာဗာ...ဒီစာအုပ်တွေက တပည့်တော် အရမ်းနှစ်သက်မိခဲ့တဲ့ စာအုပ်တွေပါ။ ဂျော့ဝါရှင်တန်အကြောင်းဆိုရင် ပိုပြီး သဘောကျပါတယ်။ ဆောင်းပါးရဲ့ အဓိက မိန်းကတော့ “ရေနံရှာသူများ”ဖြစ်မှာပေါ့။ အော် ရေနံခေတ်လို့ ဆိုရမလို ဖြစ်နေပါပြီ။
ရေတွေ အားလုံးနီးပါး နံသွားကြပါပြီ။
ကျေးဇူးအများကြီး တင်ပါတယ်...