16 July, 2010

ရဟန်းနှင့် ရဟန်း၏ ဖခင်(ဆက်ဖတ်ရန်)

(၁)
ယခုနှစ် ၀ါဆိုလတစ်ရက်ရက်တွင် သူ့ဖခင်သည် အသက်ခြောက်ဆယ့်ခြောက်နှစ် ပြည့်မြောက်ပေတော့မည်။ သူ့ဖခင်၏ မွေးနေ့သည် ၀ါဆိုလ၏ တစ်ခုသော ရက်မြတ်မင်္ဂလာအဖြစ်သာ သိ၍ ဘယ်နေ့ ဘယ်ရက်ဟု အတိအကျမသိခြင်းမှာ ရဟန်းတစ်ပါး၏ မိသားစုနှင့် ကင်းကွာမှုကြောင့်သာ ဖြစ်လေသည်။ သို့သော် သူ့ဖခင်သည် တနင်္လာဖွားတစ်ယောက်ဆိုသည်ကိုတော့ ရှူးရှူးဒိုင်းဒိုင်းပြုမူတတ်သော စရိုက်ကိုပင် ဂုဏ်ယူကာ “ ငါတို့က တနင်္လာကျားကွနော်” ဟု မိခင်နှင့် ကတောက်ကဆစကားဆိုလေတိုင်း ကြားနေကျဖြစ်သည်။

ဖခင်ကို ချစ်သော သားတစ်ယောက်အနေဖြင့် သူသာ ရဟန်းတစ်ပါးမဟုတ်ဘဲ စီးပွားရေးလုပ်ငန်းရှင် လူငယ်တစ်ယောက်ဖြစ်မည်ဆိုလျှင် သူ့ဖခင်၏ မွေးနေ့တွင် အဖြူရောင် သို့မဟုတ် အပြာရောင်လေ ဘယ်လ်တံဆိပ် စကော့ဝီစကီတစ်လုံးကို မွေးနေ့လက်ဆောင်အဖြစ် ကန်တော့မိမည်ထင်သည်။ (ဤ၀ါကျကို ဖတ်ပြီးလျှုင် သူ့ကို “ရဟန်းဖြစ်ပြီးတော့ ဒီလို ပြောရလား ” ဆိုသည့်အတွေးဝင်ကောင်း ၀င်သွားနိုင်သည်။) သားသမီးများကသာ မိဘများကို စိတ်ကြိုက်ပူဆာ ဂျီကျခွင့်ရှိသော်လည်း မိခင်ဖခင်တို့ကတော့ ပူဆာခွင့်နည်းပါးကြသည်ကို ခံစားနားလည်နေမိသည်။ မိခင် ဖခင်တွေ ဘာကို ကြိုက်နှစ်သက်ကြပါလိမ့်။ ကောင်းတာပဲဖြစ်ဖြစ် ဆိုးတာပဲ ဖြစ်ဖြစ်။ စိတ်ကြိုက်ဘူးဖေးခံစားမှုမျိုး သူတို့လည်း ရချင်ရှာမှာပါပဲ။

သို့သော် လွန်ခဲ့သောတစ်ပတ်က ရွာလေးဆီ ဖုန်းခေါ်ဖြစ်တော့ မိခင်ကြီးနှင့် စကားပြောခွင့်ရသည်။ ဖခင်ကြီးကတော့ အခြားရွာတစ်ရွာမှ အမျိုးများ၏ အလှူတစ်ခုသို့ ရောက်နေသည်တဲ့။ “ ဦးဇင်း ဒကာကြီးတော့ လိမ္မာနေပြန်ပြီ၊ မသောက်တော့ဘူး ကိုယ်တော်” တဲ့။

(၂)

“လိမ္မာနေပြန်ပြီ” ဟူသော စကားတွင် ခဏ ခဏ လိမ္မာတတ်ခြင်းသဘောကို သူဖတ်မိသည်။ သို့သော် သည်တစ်ကြိမ်တွင် သူ့ဖခင်သည် သူမျှော်လင့်စောင့်စားနေသော အချိန်ကာလနှင့် နေရာတစ်ခုကို ရောက်နေပြီဟု ယုံပစ်လိုက်ပါသည်။ အသောက်အစားမကင်းသော သူ့ဖခင်သည် သားသမီးများအတွက် တာဝန်ကျေသော အဖေတစ်ယောက်အဖြစ် ခိုင်မာစွာ ရပ်တည်ခဲ့ခြင်းကို သူက အမြဲတမ်းဂုဏ်ယူခဲ့ပါသည်။ လောကီနယ်နှင့်သာ ဆက်စပ်နေမည်ဆိုလျှင်တော့ သူ့ဖခင်သည် အပြစ်မရှိပါ။

သို့သော် သာသနာ့ဘောင်တွင် သားတစ်ယောက်ရှိနေသော ဖခင်အတွက်တော့ သောက်နေကျ သေရည်ခွက်တိုင်းတွင် တစ်ခုခုတော့ ကပ်ငြိနေဟန်တူပါသည်။ သူကလည်း သူ့ဖခင်နှင့်တွေ့တိုင်း “လျှော့သောက်ပေါ့ အဖေရာ” ဟုသာ ပြောဖြစ်ခဲ့သည်။ “ဖြတ်ပစ်လိုက်ပါ” ဟု ပြောရန် အားနာမိသောကြောင့် ဖြစ်သည်။ ဖခင်ခမျာလည်း ခဏ ခဏ ဖြတ်ရန်သာ ဦးတည်ခဲ့ဟန်တူပါသည်။ ဖခင်နှင့် ပတ်သက်သော သတင်းက နှစ်ခုသာ ဖြစ်သည်။ “ဖြတ်လိုက်ပြီ”နှင့် “ ပြန်သောက်နေပြန်ပြီ” ဟူသော ဝေါဟာရကြားတွင် ကူးနေသည့် ဖခင်ကို သူက မေတ္တာပျက်ခြင်း၊ငြိုငြင်ခြင်းမရှိခဲ့ပါ။

(၃)
သူ့ဖခင်သည် ကျေးလက်မြေပိုင်ရှင်တစ်ယောက်၏ တစ်ဦးတည်းသော သားဖြစ်သည်။ မွေးရာပါကျန်းမာ ရေးချူချာသည့် အမတစ်ယောက်သာ ရှိသည့်အတွက် မိဘအမွေခံသားလည်း ဖြစ်ခဲ့သည်။ ဖခင်၏ အမကြီးကို သူငယ်စဉ်က မီလိုက်သေးသည်။ စကားမပီ ဉာဏ်ရည်မပြည့်ရှာသော ဒေါ်ကြီးပုကို ဖခင်က ပြုစုစောင့် ရှောက်ထားခဲ့သည်။ သူ ကိုရင်မ၀တ်မီမှာ ဒေါ်ကြီးပု ကွယ်လွန်သွားသည်ကို မှတ်မိသည်။

သူ့ဖခင်သည် ရဟန်းဝတ်ချင်သည့် စိတ်ရှိသည်။ သို့သော် တစ်ဦးတည်းသောအမွေခံသားအတွက် ထိုအခွင့် အလမ်းနည်းပါးခဲ့ပါသည်။ မြန်မာ့ယဉ်ကျေးမှုဓလေ့အရ ငယ်ငယ်ရွယ်ရွယ်ဖြင့် သင်္ကန်းစည်းခဲ့ရသော်လည်း အဖြစ်သည်းသော အမေကြီး(ဖခင်၏ အမေ)ကြောာင့် တစ်ရက်တည်းသာ ရွှေကျောင်းပျော်ကိုရင်လေးဖြစ်ခဲ့ ရသည် တဲ့။

သို့သော် ငယ်စဉ်က ရွာဦးဘုန်းတော်ကြီးကျောင်းတွင် ပညာရေးအစပျိုးခဲ့ရသည့် ဖခင်သည် ပညာတတ်ဆရာတော်ကြီး၏ ဘုန်းရိပ်ကံရိပ်ကို မှီခွင့်ရခဲ့သည်။ ကြည်ညိုအားကျခဲ့သည်။ သူ့ဖခင်က ငယ်ဘ၀ အကြောင်းပြောတိုင်း ကံ့ကူလက်လှည့်ငယ်ဆရာတော်ကြီးအကြောင်းကို တခုတ်တရ ပြောပြတတ်သည်။ သူ့ဖခင် ၏ ကံ့ကူလက်လှည့်ဆရာတော်ကြီးက လောကီလောကုတ္တရာ စွယ်စုံပညာရောင် ပြောင်းဝင်းခဲ့ သည်တဲ့ ။

ပိဋကတ်စာပေသာမက ဂဏန်းဗေဒင်၊ နက္ခတ်တာရာ၊ သင်္ချာစသော ရှေးသင်ရိုး ညွှန်းတမ်းကို ကျေပွန် တတ်ကျွမ်းတော်မူသလို ခေတ်ကာလအလျောက် အင်္ဂလိပ်စာတတ်ပေတတ်လည်း ဖြစ်သည်တဲ့။ တစ်ခါတစ်ရံမှာတော့ ဂျပန်စကားဖြင့်ပင် ကျိန်းမောင်းတော်မူလေ့ရှိပြန်သတဲ့။ ရပ်ကျိုးရွာကျိုး သယ်ပိုးတော်မူ သည့်အတွက် ရပ်ရွာတွင် သြဇာပြန့်ကာ သူကြီးကိုပင် အမြင်မတော်လျှင် ကျောင်းသို့ ခေါ်ကာ ကြိမ်ဖြင့် ဆော်လေ့ရှိပါသတဲ့။

(ဖခင်ပြောသော ထိုဆရာတော်ကြီးအကြောင်းကို ခဏ ခဏကြားရဖန် များ၍ သူလည်း သာသနာဘက်ယိမ်းကာ ပညာတတ်တစ်ဦးဖြစ်ရန် ပိုးထခဲ့ဟန် တူသည်။ စုဝေးချိတ်ဆွဲရန် အောင်လက်မှတ် (Certificates)မိတ္တူများကိုတော သူ့ဖခင်အား ပေးအပ်ခဲ့ပြီး ဖြစ်သည်။ စာရွက်စာတမ်းများအပေါ်မှာသာ ယုံကြည်ပုံအပ်ထားပြီးဖြစ်လျှင် ပညာတတ်တစ်ယောက်ဖြစ်ရန် မခက်ခဲတော့သော ဂလိုဘယ်အရွေ့ထဲတွင် ရွာဦးကျောင်းဆရာတော်ကြီးကဲ့သို့ စိတ်စေတနာ၊ပညာနှင့် သင့်လျော်သော ရပ်ဝန်းမျိုးကို ဖန်တီးဖို့တော့ သူက ရှာဖွေဖြည့်ဆည်းရဦးမည်ဖြစ်သည်။)

နောက်တော့ သူ့ဖခင်သည် မိဘများ၏ ဆန္ဒအရ အစိုးရတန်းကျောင်းသို့ ပြောင်းရွှေ့ပညာသင်ခဲ့ရသည်။ ထိုအချိန်က သူတို့ရွာလေးတွင် သူ့ဖခင်သည် ရှားပါးသော မြို့ကျောင်းတက်လူငယ်တစ် ယောက်ဖြစ်ခဲ့သည်။

3 comments:

ashin kusalasami said...

ဦးဂင်္ဂါရဲ့ ဘ၀ပုံရိပ်လေးများနှင့် ထိုပုံရိပ်များက ဖြာထွက်လာသော အတွေးစလေးတွေကို စောင့်မျှော် ဖတ်ရှုပါအုံးမည်....

MND said...

ဦးဇင်းအဖေအကြောင်း ဆက်ရေးပါအုံး ဘုရား။
တပည့်တော်အဖေလဲ ၀ါဆိုလပြည့်ကျော်တရက်မှာ မွေးပါတယ်။ အသက် ၆၅နှစ် ပြည့်ပြီးပါပြီ။
တပည့်တော်လဲ အဖေ့ကို ချစ်တဲ့သူမို့ အဖေအကြောင်းတွေ ဖတ်ရတာ သိပ်သဘောကျလို့ပါ။

Me said...

သားသမီးများကသာ မိဘများကို စိတ်ကြိုက်ပူဆာ ဂျီကျခွင့်ရှိသော်လည်း မိခင်ဖခင်တို့ကတော့ ပူဆာခွင့်နည်းပါးကြသည်ကို ခံစားနားလည်နေမိသည်။