နာလန္ဒာမှာ ဒလိုင်လားမားကို ထားခဲ့တော့

နာလန္ဒာကျောင်းတော်ဟောင်း

(၁)

ခွဲခွာရမယ့် အနာဂတ်ရဲ့
ညနေတစ်ခုမှာ
လှပစွာ မင်းပြုံးနိုင်ဖို့
မျက်ရည်များနဲ့ ငါပျော်မွေ့ဆဲပါ။
ထားခဲ့ကွယ်
ထားခဲ့
ရာဇ၀င်ထဲမှာ မောင့်ကို ထားရစ်ခဲ့။
(ပိုင်စိုးဝေ)

စောစောစီးစီး ဆရာပိုင်စိုးဝေကြီးရဲ့ ကဗျာတစ်ပိုင်းတစ်စ နှုတ်ဝယ်ရွရွဖြစ်သွားရပေါ့။ ရာဇ၀င်ထဲမှာ မောင့်ကို ထားရစ်ခဲ့ တဲ့။ ဆရာမဂျူးက ကဗျာစာသားလေးကို ၀တ္ထုတစ်ပုဒ်မှာ ခေါင်းစီးတင်လိုက်တဲ့အခါ ပိုကြွသွားတယ်။ ရာဇ၀င်ထဲမှာ မောင့်ကို ထားရစ်ခဲ့။ ဒီမနက် ဖတ်မိတဲ့သတင်းကလည်း '' Nalanda versity revival , minus the Dalai Lama'' (နာလန္ဒာမှာ ဒလိုင်လားမားကို ထားခဲ့တော့) ဖြစ်နေပါရောလား။

(၂)
နာလန္ဒာတက္ကသိုလ်ကြီးကို ပြန်လည်အသက်သွင်းမယ့် ပရောဂျက်မှာ အဓိကပါဝင်မယ့် တရုတ်နိုင်ငံကို ငဲ့ကွက်သောအားဖြင့် ဒလိုင်လားမားကို အိန္ဒိယအစိုးရက ထားခဲ့ရမှာ ဖြစ်ပါတယ်။ နာလန္ဒာပရောဂျက်မှာ ဒလိုင်လားမားကြီး မပါကြေး။

ဒီနေ့ ကျင်းပတဲ့ အိန္ဒိယကက်ဘိနက်အစည်းအဝေးမှာ တရုတ်နဲ့ အခြား ၁၂ နိုင်ငံပါဝင်တဲ့ အာရှထိပ်သီးညီလာခံအဖွဲ့က ဦးဆောင်မယ့် နာလန္ဒာကို နိုင်ငံတကာ တက္ကသိုလ်ကြီးအဖြစ်ပြန်လည် အသက်သွင်းရေးစီမံကိန်းအတွက် ငွေကြေးလျာထားချမှတ်ဖို့ ဆုံးဖြတ်ခဲ့ပါတယ်။

နာလန္ဒာတက္ကသိုလ်ကြီးကို ဒီနှစ်မှာ အစပြုလည်ပတ်နိုင်တော့မှာဖြစ်သလို သင်ရိုးညွှန်းတမ်းကတော့ ဗုဒ္ဓဓမ္မကိုပဲ အခြေခံမှာ ဖြစ်ပါသတဲ့။ ၁၂ နှစ်ရာစုမှာ ကျူကျော်ဖျက်ဆီးသူတွေကြောင့် နာလန္ဒာတက္ကသိုလ် ကျောင်းတော်ကြီး မီးလောင်ပျက်သုံးသွားပြီးနောက်ပိုင်း နာလန္ဒာရဲ့ မဟာယာနဂိုဏ်း အစဉ်အလာကို တိဘက်က ထိန်းသိမ်းဆက်ခံခဲ့တာပါ ။

“ဒလိုင်လားမားအရှင်ကို နာလန္ဒာပရောဂျက်မှာ ထားခဲ့တဲ့ အိန္ဒိယနိုင်ငံရဲ့ သဘောထားက ရယ်စရာကောင်းပေမယ့် ပထ၀ီနိုင်ငံရေးသဘောတရားအရတော့ ဒီလိုပဲ ဖြစ်သင့်ပါတယ် ” လို့ ဒလိုင်လားမားကြီးရဲ့ သာဝကတွေက ဆိုပါတယ်။ ဒလိုင်းလားမားအရှင်မြတ် ဒီပရောဂျက်မှာ ပါဝင်တာထက် ဗုဒ္ဓဘာသာနိုင်ငံအများစုရဲ့ အထောက်အပံ့နဲ့ နာလန္ဒာတက္ကသိုလ်ကြီး ပြန်လည်ရှင်သန်ရေးက ပိုအရေးကြီးပါတယ် တဲ့။

ဒလိုင်လားမားကြီး မပါဝင်ပေမယ့် ဒီပရောဂျက်ကို စီးပွားရေးနိုဘယ်ဆုရှင် အမရ်တျာ ဆင်းက ဦးဆောင်မှာ ဖြစ်ပါတယ်။ တရုတ်နဲ့ စင်ကာပူအပါအ၀င် အရှေ့အာရှနိုင်ငံများမှာ နာလန္ဒာတက္ကသိုလ်ပြန် လည်ရှင်သန်ရေးအတွက် အဆိုပြုလွှာတွေ ရရှိရေး အစည်းအဝေးတွေ ထပ်ထလဲလဲကျင်းပပြီးတဲ့ နာလန္ဒာအကြံပြုအဖွဲ့ကို အမရ်တျာဆင်းက ဦးဆောင်မှာ ဖြစ်ပါတယ်။

နောက်လက စပြီး နာလန္ဒာတက္ကသိုလ်ကြီးရဲ့ စည်းမျဉ်းတွေ ရေးဆွဲကြတော့မယ့် နာလန္ဒာအကြုံပြုအဖွဲ့ဟာ အရှေ့အာရှနိုင်ငံများအဖွဲ့က တက္ကသိုလ်ဘုတ်အဖွဲ့ဝင်တွေကို မရွေးချယ်ရသေးမီအထိ တက္ကသိုလ်အုပ်ချုပ်ရေး အဖွဲ့အဖြစ်တည်ရှိနေမှာ ဖြစ်ပါတယ်။ သမ္မတကြီးကတော့ ဧည့်သည်တော်ဖြစ်ပါလိမ့်မယ်။ ဒေလီ ဆရီရမ် အမျိုးသမီးကောလိပ်က ဂိုပါ ဆဘာဝါလ်ဟာ နာလန္ဒာတက္ကသိုလ်ကြီးရဲ့ ပထမဆုံးပါမောက္ခချုပ်ဖြစ်နိုင်ပါသတဲ့။

နာလန္ဒာအပြည်ပြည်ဆိုင်ရာတက္ကသိုလ်ကြီးဟာ ဗီဟာပြည်နယ်ပြတိုက်ထဲမှာသိမ်းဆည်းထားခဲ့တဲ့ ကိုယ်ပိုင် ကျောင်းတော်အမှတ်တံဆိပ်နဲ့ သီးခြားတက္ကသိုလ်ကြီးအဖြစ်တည်ရှိမှာ ဖြစ်ပါတယ်။ အာရှထိပ်သီးနိုင်ငံများနဲ့ ညှိနှိုင်းပြီး တက္ကသိုလ်ကြီးပြန်လည် ရှင်သန်ရေးအတွက် ဆောင်ရွက်နေပြီဖြစ်ပါတယ်။ အိန္ဒိယအစိုးရက ရူပီး ကုဋေပေါင်း ၁၀၀၅ ထည့်ဝင်မှာ ဖြစ်ပါတယ်။ စီမံကိန်းကော်မရှင်က တက္ကသိုလ်ကြီး ကိုယ့်ခြေကိုယ့် လက်ရပ်တည်နိုင်တဲ့ အချိန်ထိ ရူပီး ကုဋေငါးဆယ် သုံးစွဲပါလိမ့်မယ်။ တက္ကသိုလ်အနေနဲ့လည်း လူထုနဲ့ ပုဂ္ဂလိကအလှူရှင်တွေဆီက အလှူငွေတွေ ရရှိနိုင်မှာ ဖြစ်သလို အခြားသော အဖွဲ့ဝင်နိုင်ငံတွေကလည်း စေတနာအလျောက်ထည့်ဝင်လှူဒါန်းကြမှာ ဖြစ်ပါတယ်။

နာလန္ဒာတက္ကသိုလ်ကြီးမှာ သင်ကြားပို့ချပေးဖို့ အဆိုပြုထားတဲ့ဘာသာရပ်တွေကတော့
ဗုဒ္ဓဘာသာသုတေသနပညာ(Buddhist Studies,)
ဒဿနနှင့် ဘာသာတရားများနှိုင်းယှဉ်လေ့လာမှုပညာ (Philosophy and Comparative Religions Studies) နိုင်ငံတကာဆက်ဆံရေးနှင့် ငြိမ်းချမ်းရေးသုတေသနပညာ (International Relations & Peace Studies, )
လူထုရေးရာမူဝါဒနှင့် ဖွံဖြိုးရေးဆိုင်ရာ စီးပွားရေးစီမံခန့်ခွဲမှုပညာ(Business Management in relation to Public Policy and Development Studies, )
ဘာသာစကားများနှင့် စာပေပညာ (Languages and Literature; )
ဂေဟဗေဒနှင့် ပတ်ဝန်းကျင်သုတေသနပညာ(Ecology and Environmental Studies) များဖြစ်ပါသတဲ့။

အိန္ဒိယနိုင်ငံ၊ဗီဟာပြည်နယ်အစိုးရကတော့ တက္ကသိုလ်စီမံကိန်းအတွက် ရာဇဂြိုဟ်၊ နာလန္ဒာကျောင်း တော်အဟောင်းနားမှာ မြေဧက ငါးရာ အဆင်သင့်ရရှိပြီးဖြစ်ပါတယ်။ နောက်ထပ် မြေဧက ငါးရာ ဆက်လက်ရရှိဦးမှာ ဖြစ်ပါတယ်။ အိန္ဒိယအစိုးရအနေနဲ့ကတော့ ခရီးသွားလုပ်ငန်းအတွက်လည်း အကျိုးအမြတ်အများကြီး ရဦးမှာပါ။

(၃)

ကဲ နာလန္ဒာပရောဂျက်မှာ ဒလိုင်လားမားကြီးကို ထားခဲ့မှ ဖြစ်မှာကိုး။

ဓမ္မဂင်္ဂါ
၀၈-၀၇-၂၀၁၀

မူရင်းစာမျက်နှာ