21 August, 2012

၂၀၀၆ ဒိုင်ယာရီပြပွဲ (၂)

ဇန်န၀ါရီလ(၂) 
တနင်္လာနေ့

နံနက်ခင်း တီဗီချန်နယ်လ်အသီးသီး၏ ကမ္ဘာ့အရေး အရာများတွင် ငေးမောနေခိုက် ဒေါက်တာ အရှင်ဥတ္တရဥာဏပြုစုသည့် ကမ္ဘာ့သာသနာပြုအင်္ဂလန်နိုင်ငံ ဘာမင်ဂန်ဆရာတော်ဒေါက်တာ အရှင်ရေ၀တဓမ္မ၏အတ္ထုပ္ပတ္တိ(မူကြမ်း)စာအုပ်ထူထူကြီး ရောက်ရှိလာသည်။ 

ပျံလွန်တော်မူခဲ့ပြီဖြစ်သော ဘာမင်ဂန်ဆရာတော်ကြီး၏  (၁) ဘာမင်ဂန်ဗုဒ္ဓတက္ကသိုလ်တည်ထောင်ခြင်း 
(၂) မွေးရပ်မြေ ဇလွန်မြို့နယ်၊ သမန်းကုန်းရွာတွင် တွဲဘက်အလယ်တန်း ကျောင်းဆောင် တည်ဆောက်လှူဒါန်းခြင်းနှင့်  (၃)အတ္ထုပ္ပတ္တိ စာအုပ်ထုတ်ဝေခြင်းစီမံကိန်းများကို ဆရာတော်၏ တူဖြစ်သူ လှသီတာ ကျောင်းဒကာမိသားစုက အားစိုက်နေကြသည့်အတွက် ဒိုင်ယာရီရှင်ကိုယ်တိုင်လည်း ပါဝင်ပတ်သက်နေရသည်။ ဘာမင်ဂန်ဆရာတော်၏ မွေးရပ်မြေသို့ပင် နှစ်ကြိမ်တိတိ လိုက်ပါခဲ့ဖူးပြီ။ ယခု အတ္ထုပ္ပတ္တိစာမူကြမ်းကိုတော့ စာလုံးအကျအပေါက်များ မကျန်အောင် ဖတ်ပေးရခြင်းဖြစ်ပါသည်။

ကျောင်းဝင်းအတွင်း၌ ကျင်းပနေလျက်ရှိသော မြို့မလှသီတာဖလား လွတ်လပ်ရေးနေ့ အကြိုဂုဏ်ပြု ဘောလုံးပွဲ (ဆီမီးဖိုင်နယ်)မှ လွင့်ပျံ့လာသည့် အုံ့အုံ့ခြိမ့်ခြိမ့် အသံများကို ကြားနေရသည်။ အားကစားကွင်းပျောက်ဆုံးနေသော လူငယ်များအတွက် ကွက်လပ်ဖြည့်ပေးခဲ့သည်မှာ လေးနှစ်ပင် ရှိချေပြီ။ လူငယ်နှင့် အားကစား တွဲဖက်ပေးလိုက်ခြင်းဖြင့် စာရိတ္တနှင့် စိတ်ဓါတ်ကြံ့ခိုင်မှုကို အထောက်အကူ ဖြစ်စေပေလိမ့်မည်။

နေ့လည်ဘက်တွင် မဟာဝိဇ္ဇာတန်းများအတွက် အတန်းတက်ရန် မရှိသော်လည်း ထေရ၀ါဒတက္ကသိုလ်ဆီ ရောက်ဖြစ်သေးသည်။ 

ဘွဲ့လွန်ကျောင်းသားများအတွက် ဖွင့်ပေးထားသည့် အင်တာနက်ခန်းမတွင် သတင်းများ တစ်ခုပြီးတစ်ခု ကလစ်ကာ ဖတ်ဖြစ်၏။ အသုံးပြုစဖြစ်၍ ကျွမ်းကျင်မှုမရှိသေးသော်လည်း ဒေါက်တာ Rလေး (Ashin Acara ယခု နိုင်ငံတော်ပရိယတ္တိသာသနာတက္ကသိုလ်(မန္တလေး)၊ပိဋကတ်ဆိုင်ရာအင်္ဂလိပ်စာဌာန၊ ဌာနမှူးနှင့် ရာဟုလာသင်တန်းကျောင်းတည်ထောင်သူ) နှင့် ရှင်ညာဏိန် ( Ashin Nyaninda ITBU) တို့၏ ဆိုဆိုဆဲဆဲ ကူညီမှုများက များစွာ အထောက်အကူရပါသည်။

ကျောင်းသို့ အပြန်တွင် အရှင်နှစ်ပါး လိုက်ပါလာခဲ့ကြ၏။ ဘောလုံးပွဲစဉ်များကား မပြီးသေး။ မနက်ခင်းတစ်ကြိမ် ညနေခင်းတစ်ကြိမ်ကျင်းပနေခြင်းဖြစ်သည်။
ညနေပိုင်းတွင် တာမွေ၊မလွှကုန်း စိမ့်စမ်းရည်ဘော်ဒါမှ ဆရာမကြီးဒေါ်မြစမ်းရောက်လာသည်။ Sony အမျိုးအစားအသံဖမ်းကက်ဆက်ပလေယာသေးသေးလေးတစ်လုံး၊ ယခုရေးနေသည့် ဒိုင်ယာရီနှင့် စာဖတ်ရာတွင် အက္ခရာအစဉ်အတိုင်းမှတ်ရန် မှတ်စုစာအုပ် (၃၃) အုပ်တိတိ လှူဒါန်းသည်။ မှတ်ပေးရော..။ ရေးပေရော..။ သူမက ထေရ၀ါဒတက္ကသိုလ်တွင် ဒီပလိုမာတန်းတက်နေသည်။

သူမက ဖတ်စေချင်သည့် စာအုပ်များငှါးပေးတတ်သည်။ ယခုရက်ပိုင်း မောင်ထွန်းသူဘာသာပြန်သည့် (Citidal by A.J. Cronin ) ရဲတိုက်ဝတ္ထုကြီးကို အပြီးသတ်ဖတ်နေရသည်။
အပြန်တွင် ငယ်စဉ်က နေထိုင်ခဲ့ဖူးသည့် ကျောက်မြောင်းဓမ္မ၀ိဟာရလမ်းရှိ၊ ဗြဟ္မ၀ိဟာရကျောင်းလေးဆီ ခရီးကြုံလိုက်ဖြစ်ခဲ့သည်။ နောင်တော်ကြီးသဖွယ်စောင့်ရှောက်လေ့ရှိသည့် အရှင်ဇိတိန္ဒြိယနှင့်အတူ တရံရောအခါဆီက ရှေးဟောင်းနှောင်းဖြစ်များဆီ စကားလုံးများကို စီးရင်း ရောက်အောင် သွားဖြစ်ခဲ့ကြလေသည်။

ဇန်န၀ါရီလ (၃)
အင်္ဂါနေ့


နံနက်ခင်း မျက်နှာသစ်နေစဉ်မှာပင် ဆရာမကြီးဒေါ်မြစမ်း ရောက်လာခဲ့သည်။ မောင်ထွန်းသူ၏ ရဲတိုက်ဘာသာပြန်စာအုပ်များကို ပြန်ပေးရင်း ရင်ကို ထိရှစေသည့် ဆရာဝန်လေး အင်ဒရူးမေဆန်၏ လူသားဆန်မှုများကို ပြောဖြစ်ကြသည်။ သွေးပျက်ဖွယ်ခေတ်ပျက်ကြီးထဲက ရှေးရိုးစွဲဥပါဒါန်များကို မလွန်မြောက်ဘဲ အသစ်တွေ့ရှိချက်မှန်သမျှကို ငြင်းဆန်လိုသည့် အဖွဲ့အစည်းလိုက်ယိုယွင်းမှုက နှာခေါင်းရှုံ့ချင်စရာ။ သည်သို့ဖြင့် လူတွေ အိုမင်းရင့်ရော်သွားခဲ့ကြသည်။ အတွေးတွေ တိမ်ကောသွားခဲ့ကြသည်။ ဘယ်လို ဂုဏ်သိက္ခာတွေကများ အရောင်တက်လာခဲ့ကြပါလိမ့်။

(၅၉) ဒိုင်နာဘတ်စ်နှင့် (၄၃) မိနီဘတ်စ် ဖြတ်ကျော်ပြီးကာမှ စွယ်တော်ဘုရား မုခ်ဦးဝသို့ ရောက်ရှိလာခဲ့သည်။ ထေရ၀ါဒတက္ကသိုလ်စာသင်ခန်းဆီ ခြေလျင်ခရီး....။
ပါမောက္ခ ဆရာမကြီးဒေါက်တာဒေါ်မြင့်မြင့်အေး၏ သုတေသနပြုခြင်းနှင့် ကျမ်းစာရေးသားမှု ဆိုင်ရာပို့ချချက်များက ပြန့်လွင့်ဝေ့၀ဲနေသည့် အဇ္ဈတ္တတွင် မတိကျသည့် ဒေတာများဖြစ်လာခဲ့ကြသည်။

အင်္ဂါနေ့ ဆွမ်းအလှူရှင်များကို ငဲ့ကွက်ကာ တက္ကသိုလ်ဆွမ်းစားဆောင်သို့ မ၀င်တော့ဘဲ
သမိုင်းကို ပြန်လှည့်လာခဲ့သည်။
နေ့ပိုင်း (၁း၀၀) နာရီတွင် အင်တာနက်ခန်းမသို့ ရောက်ဖြစ်ပြန်သည်။ ထုံးစံအတိုင်း ဒေါက်တာRနှင့် ရှင်ညာဏိန်တို့ ဆရာကြီးလုပ်သမျှကို ငြိမ်နားထောင်ရသည်။

ညနေဘက်မှာတော့ ပါမောက္ခချုပ်ဆရာတော်ဒေါက်တာအရှင်နန္ဒမာလာဘိဝံသအခန်းသို့ မထေရ်ကြီး (အရှင်ထေရိန္ဒ ယခု ဗန်ကောက်ဓမ္မကာယဖောင်ဒေးရှင်း) နှင့်အတူ ရောက်ဖြစ်သည်။ မထေရ်ကြီးက မနက်ဖြန် သီရိလင်္ကာသို့ ပညာသင်ကြွရောက်တော့မည်ဖြစ်၍ တာဝန်ထမ်းဆောင်နေသည့် တိပိဋကအင်္ဂလိပ်ဘာသာပြန်အဖွဲ့ဝင် အဖြစ်မှ နှုတ်ထွက်လွှာကို ပါမောက္ခချုပ်ဆရာတော်ထံ ဆက်ကပ်သည်။
ညမှောင်ရီပျိုးကာမှ အငှါးယာဉ်တစ်စီးဖြင့် ကျောင်းပြန်လာခဲ့သည်။

ဓမ္မဂင်္ဂါ
(၁၄-၈-၂၀၁၂)

2 comments:

Anonymous said...

အရှင်ဘုရားရဲ့ Diary တစ်အုပ်လုံးကို ဖတ်ရန် စောင့်မျှော်နေပါတယ် ဘုရား ...

Anonymous said...


အရှင်ဘုရားရဲ့ Diary တစ်အုပ်လုံးကိုဖတ်ရန်စောင့်မျှော်နေပါသည် ဘုရား ...