သီတဂူလမ်း(၆)

စစ်ကိုင်းတောင်အရိပ်ကို ခိုမိရင်ပဲ နေရောင်က အလင်းဖျော့စပြုပါပြီ။ ဇေယျပူရမြို့တော်အဖြစ်ထင်ရှားခဲ့ဖူးတဲ့ တစ်ရံခါဆီက စစ်ကိုင်းဟာ သမိုင်းအသစ်တွေရေးဖို့ တက်ကြွနေခဲ့တာပါပဲ။ အလံတံခွန်တလူလူတွေကြားထဲ ဖြတ်မောင်းလာတဲ့ သူတို့ရဲ့ ဟိုင်းဝေး ဘတ်စ်ကားကြီးက သီတဂူအပြည်ပြည်ဆိုင်ရာဗုဒ္ဓတက္ကသိုလ်မုခ်ဦးမှာ ငြိမ့်ကနဲ ထိုးရပ်လိုက်ပါတယ်။ WOH! အားလုံးဟာ တောက်ပနေတော့တာပါ။
နတ်ဒေ၀တာတို့ဖန်ဆင်းထားတဲ့ ရေကန်ထဲ ခုန်ဆင်းလိုက်ကြရတာပါ။ အရာရာဟာ လင်းလက် နေခဲ့ပါတယ်။ ခမ်းနားတဲ့ မုခ်ဦးဝ။ ကြီးကျယ်မှုဆိုတဲ့ ဝေါဟာရကို ကိုယ်စားပြုနေတဲ့ သန္တိမဟာဘွဲ့နှင်းခန်းမကြီးနဲ့ တက္ကသိုလ်အခန်းခန်းအဆောင်ဆောင်များက မင်သက်အံ့သြမှုကိုသာ ဖြစ်စေခဲ့ပါတယ်။ တက္ကသိုလ်အဆောင် တွေရဲ့အမည်တွေကလည်း ဗုဒ္ဓခေတ်မဇ္ဈိမနဲ့ မြန်မာနိုင်ငံတော်ရဲ့ သာသနာထွန်းကားပြန့်ပွားရာမြို့ပြတွေကို ပြန်ရောက်သွားစေပါတော့တယ်။
ကြည့်ပါဦး ။
အရှေ့မြောက်ထောင့်အရပ်ကနေ အရှေ့တောင်ထောင့်အရပ်အထိ
၁။ကာသိဆောင်
၂။ဗာရာဏသီဆောင်
၃။မိဂဒါဝုန်ဆောင်
၎။မဂဓဆောင်
၅။ဥရုဝေလဆောင်
၆။ဂယာဆောင်
အရှေ့တောင်ထောင့်အရပ်ကနေ အနောက်တောင်ထောင့်အရပ်ထိ
ရ။ဂန္ဓာရဆောင်
ဂ။ပါဋလိပုတ်ဆောင်
၉။လင်္ကာဒီပဆောင်
၁၀။အမရာဝတီဆောင်
၁၁။ယောနကဆောင်
၁၂။ဝေသာလီဆောင်
အနောက်တောင်ထောင့်အရပ်ကနေ အနောက်မြောက်ထောင့်အရပ်အထိ
၁၃။ရာဇဂြိုဟ်ဆောင်
၁၄။နာလန္ဒာဆောင်
၁၅။သာဝတ္ထိဆောင်
၁၆။ကပိလ၀တ္ထုဆောင်
၁၇။လုမ္ဗိနီဆောင်
၁၈။ဒေ၀ဒဟဆောင်
အနောက်မြောက်ထောင့်အရပ်ကနေ အရှေ့မြောက်ထောင့်အရပ်အထိ
၁၉။ရတနာပုံဆောင်
၂၀။ဟံသာဝတီဆောင်
၂၁။ပုဂံဆောင်
၂၂။သရေခေတ္တရာဆောင်
၂၃။ကေတုမတီဆောင်
၂၄။သုဝဏ္ဏဘူမိဆောင်။
စတုဂံကျအောင် ဖွဲ့ယှက်ထားတာပါ။
အဲဒီအဆောင်(၂၄)ဆောင်အပြင် တက္ကသိုလ်ပရိဝုဏ်ကြီးရဲ့ ပဉ္စဂံနေရာတွေမှာတော့ တက္ကသိုလ်အဓိပတိ ဆောင်၊ ပါမောက္ခချုပ်ဆောင်။ မဟာထေရာဝါသဆောင်၊စီမံဆောင်နဲ့ မော်ကွန်းထိန်းဆောင်တို့ကို စနစ်တကျ အကွက်ချတည်ဆောက်ထားပါတယ်။
ကျောင်းကြီးထဲရောက်ရင် ပြန်ထွက်ချင်မှာ မဟုတ်တော့ပါဘူး။ ဗုဒ္ဓကိုယ်တော်နည်းကျ ကျောင်းဆောက် နည်းဖြစ်ပါလိမ့်မယ်။ မဂဓတိုင်းမြို့တော် ရာဇဂြိုဟ်က ဝေဠုဝန်ကျောင်းတော်ဟာ ယနေ့ခေတ်ကျောင်းတိုက် တည်နေသူတွေအတွက်နည်းယူစရာဖြစ်ပါလိမ့်မယ်။ကျောင်းထဲရောက်သူတွေကို ပြန်မထွက်ချင်အောင် စွဲ ဆောင်နိုင်သလို သူတို့ရဲ့မိတ်ကောင်းဆွေကောင်းတွေကိုလည်း ကျောင်းထဲရောက်အောင် ဖိတ်ကြားလိုတဲ့ အထိ ဆွဲအားတွေ ရှိနေရမှာဖြစ်ပါတယ်။ဗဟိဒ္ဓဆွဲအားတွေနဲ့ ဓမ္မအ၀န်းအ၀ိုင်းအထိ ပို့ပေးနိုင်ရမှာ ဖြစ်ပါ တယ်။ ဒီလိုနဲ့ အလှမာန်ကြီးလွန်းတဲ့ ဗိမ္ဗိသာရ ဧကရာဇ်ရဲ့ မဒမ်ခေမာဟာ ဝေဠုဝန်ရဲ့ ပတ်ဝန်းကျင် အလှတရားတွေကို ရှာဖွေရင်း အလှအစစ် ဓမ္မမှာ ပျော်ဝင်သွားရတာပါ။
သီတဂူဆရာတော်ကြီးက လောကီလောကုတ်အရေးအရာတော်တော်များများမှာ နှံ့စပ်သိမြင်တော်မူတာပါ။ မဇ္ဈိမတိုက်ကြီးတစ်ခုလုံး ကျေညက်အောင်သွား ခဲ့သလို လိုအပ်တဲ့အသိအမြင်တွေကိုလည်း ပိဋကတ်အရှိနဲ့ ညှိယူခဲ့တာပါ။ ဆရာတော်ကြီးက ဝေဠုဝန်ကျောင်း တော်၊ ဇေတ၀န်ကျောင်းတော်၊စတဲ့ မဟာရာမ်တွေကို ဘုရားရှင်လျှောက်ခဲ့တဲ့တိုင်း လျှောက်ခဲ့တာသေချာလေ တော့ ကိုယ်တော်တိုင် ဖန်ဆင်းတဲ့ သီတဂူအ၀န်းအ၀ိုင်းဟာလည်း ဗုဒ္ဓနည်းကျဖြစ်နေတော့တာပါပဲ။ ဆရာ တော်ကြီးရဲ့ ကျောင်းတော်တွေက ကြီးကျယ်သလို အလုပ်တွေကလည်း မြင့်မောက်နေတာပါ။ အလုပ် လက်မဲ့ ကျောင်းတော်ကြီး တွေရဲ့အနှစ်မဲ့ခမ်းနားမှုတွေကို ဆရာတော်ကြီးသတိပြုမိဟန်တူပါရဲ့။
သီတဂူဆရာတော်ကြီးက တက္ကသိုလ်မုခ်ဦးဝက ဧည့်ခံကွန်းရိပ်သာလေးမှာစောင့်မျှော်နေပါပြီ။ ဆရာတော်ကြီး ကို ဂါရ၀ပြုကြဖို့ သူတို့အားလုံးတွေရဲ့ ခြေလှမ်းတွေကလည်း
တက်ကြွနေကြခဲ့ပါလေရဲ့..။
ဝေဠုဝန်ထဲ ရောက်နေသလား ..။
ဇေတ၀န်ထဲ ရောက်နေသလား...။
ဘာပဲဖြစ်ဖြစ် သူကတော့ ကြည်နူးနေခဲ့တာပါပဲ။

သီတဂူလမ်း(၅)

သာသနာ့တက္ကသိုလ်က စစ်ကိုင်းကိုအကူးမှာတော့ နာမည်ကျော်ဓမ္မကထိကဓမ္မဒူတအရှင်ဆေကိန္ဒလည်း သူတို့ရဲ့ ဟိုင်းဝေးဘတ်စ်ပေါ်မှာ ပါလာခဲ့ပါတယ်။ စီးလာတဲ့ကားကို သီးသန့်ပြန်လွှတ်ပြီး ထေရ၀ါဒအုပ်စုတွေ စုဝေးရာကားကြီးပေါ် တက်လိုက်ခဲ့တာပါ။ ဓမ္မကထိကဆရာတော်ပါလာတော့ ပွဲစည်သွားတော့တာပါ။ ဟိတ်ဟန်ကင်းတဲ့ ပုဂ္ဂိုလ်တစ်ပါးမို့ အားလုံးက ကောင်းချီးပေးကြရတာပါ။ ဘုန်းကံအလွန်ကြီးမားသူမို့ ရှင်သီဝလိလို့လည်း အချို့က ရည်ညွှန်းကြပါသေးတယ်။ လုပ်သမျှ သာသနာပြုလုပ်ငန်းတွေကလည်း အောင်မြင်နေတာပါပဲ။

ဆရာတော်အရှင်ဆေကိန္ဒက ထေရ၀ါဒတက္ကသိုလ်တက်စဉ်က ဒီပလိုမာနဲ့ ၀ိဇ္ဇာတန်းတွေမှာ သုံးနှစ်လုံး ၀ိပဿနာဘာသာရပ်မှာ ဆရာတော်ခဲ့ဖူးပါတယ်။ နာမည်ကြီးမို့ ဆရာကောက် တော်ပစ်လိုက်တာ----လို့တော့ မထင်စေချင်ပါဘူး။ တကယ်အလုပ်လုပ်နေတဲ့ ဘုန်းကြီးတစ်ပါးမို့ လေးစားရင်းစွဲရှိနေတာပါ။

အရှင်ဆေကိန္ဒက ခေါင်းစဉ်အမျိုးမျိုးအောက်မှာ ပြေးလွှားနေရရှာတာပါ။ ထေရ၀ါဒတက္ကသိုလ် စာသင်ခန်း တွေဆီ အချိန်မှန်ရောက်ဖို့ ကြိုးစားရသလို မှော်ဘီက ဆေကိန္ဒာရာမကျောင်းမှာ ဖွင့်တဲ့ မျိုးဆက်သစ် ကလေးသင်တန်းတွေကိုလည်း သွားပြီးကြီးကြပ်ရပါသေးတယ်။ အခြားလူမှုရေး လုပ်ငန်းတွေကလည် အများကြီးပါ။ ဆရာတော့်မွေးရပ်မြေ စစ်ကိုင်းမှာလည်း သောတာပန် ဆီအလှူတော်ဆိုတဲ့ အံ့မခန်း အလုပ်ကြီး လည်း ရှိပါသေးတယ်။

စစ်ကိုင်းတောင်ရိုးပျော် သူတော်စင် တွေအတွက် ဆီလှူဒါန်းတာပါ။ လူငယ်လူရွယ်စုံတရားစခန်းတွေမှာလည်း ကလေးတွေရဲ့ ဘ၀အခက်အခဲတွေကို ကူညီဖြေရှင်းပေးလိုကြောင်း ကမ်းလှမ်းဖိတ်ခေါ်တတ်တာကို ကြားရလေ့ ရှိပါတယ်။ ဒီကြားထဲမှာ စာအုပ်ထုတ်ဝေဖို့ အခက်အခဲဖြစ်နေရှာတဲ့ စာပေပညာရှင်ကြီး တွေကို စာအုပ်ထုတ်ဝေဖို့မတည်ငွေလှူဒါန်းတတ်တာလည်း ကိုယ်တွေ့မြင်ခဲ့ဖူးပါတယ်။ ရေဘေး မီးဘေး ဆိုတာမျိုး တွေမှာလည်း ရှေ့က ရောက်ရောက်သွားတတ်ပါသေးတယ်။

ဆရာတော့်နောက်မှာ မျိုးဆက်သစ်တွေရဲ့ တက်ကြွတဲ့ ခြေလှမ်းတွေအများကြီးကို မြင်ရပါတယ်။ မျိုးဆက် သစ်တွေနဲ့ တွဲပြီး မြို့တော်သန့်ရှင်းရေး ဆိုတာမျိုးကအစ လူမှုရေးအကျိုးပြု လှုပ်ရှားမှု တွေကို ဦးဆောင် လမ်းညွှန်တတ်ပါသေးတယ်။ ဒါကြောင့်လည်း ဂျာနယ်လ်တစ်စောင်က Person of The Year လို့ ဖော်ပြခဲ့ဖူးပါတယ်။

မူလဓမ္မဒူတဆရာတော်ကြီးချမှတ်ထားခဲ့တဲ့မူကကို လှပါတယ်။ ရဟန်းမှန်ရင် စာသင်စာချ တရားဟော တရားပြ ဆိုတဲ့ မူပါ။ နောက်ကတော့ ပရဟိတဖြစ်မှာပါ။ မှော်ဘီက အရှင်ဆေကိန္ဒရဲ့ ဆေကိန္ဒာရာမကျောင်းမှာ ရှင်ငယ်ရဟန်းငယ်တွေအတွက် ပရိယတ္တိစာသင်တိုက်ရှိသလို တရားရှာယောဂီတွေအတွက်လည်း တရားစခန်း ပွဲတွေရှိနေတတ်ပါတယ်။ ဆရာတော်ရဲ့ ဓမ္မကထိကဘ၀ကတော့ လွယ်ကူသက်သာလှတယ်တော့ မဟုတ် ပေဘူး။ ပုံမှန်ဟောနေကျ ညတရားပွဲကြီး တွေအပြင် မနက်အရုဏ်ဆွမ်းတရား၊ နေ့လည်ဆွမ်းတရားဆို တာတွေလည်း ဟောရတတ်ပါသေးတယ်။

ဒီကြားထဲ ဆည်းဆာတရားပွဲဆိုတာတွေ ပါလာရင်တော့ ဓမ္မကထိကကိုယ်စားရင်ထိတ်မိပါသေးတယ်။ အထိုင်များတဲ့ ဒုက္ခက မသေးဘူးမဟုတ်လား။ တံခါးခေါက်သံတွေနဲ့ ရောက်ရောက်လာတတ်တဲ့ ဧည့်သည်တွေကလည်း အများသားပါ။ အနုပညာရှင်တွေလို တံခါးပိတ်ထားပြီး သီးခြားရပ် တည်လို့လည်း မရဘူးလေ။ Celebrity ချင်းတူပေမယ့် သာသနာ့ဝန်ထမ်း Celebrity က မသက်သာတာ သေချာပါတယ်။ ဘာပဲဖြစ်ဖြစ် ဆရာတော့်ဒုက္ခက အများအတွက် သုခကို မွေးပေးနိုင်တာမို့ နာရတာကို သာယာလောက်ပါတယ်။ တရားပွဲ တွေက ရသမျှန၀ကမ္မတွေက ဘဏ့်အကောင့်စာရင်းထဲမှာပဲ အိပ်မနေတာကိုက သာသနာပြုကုသိုလ်တော်တွေ လှနေတာ ဖြစ်ပါလ်ိမ့်မယ်။

ဆရာတော်အရှင်ဆေကိန္ဒက သူတို့ထေရ၀ါဒတက္ကသိုလ်ကျောင်းသားရဟန်းတော်တွေ စုဝေးရာ ကင်းတင်း လေးထဲ ၀င်လာပြီဆိုရင် လက်ခါပြလေ့ရှိပါတယ်။ မလွယ်ဘူးလို့ ပြောတာပါ။ အားမကျနဲ့ လို့လည်း ငြီးတတ် ပါသေးတယ်။ ဒါပေမယ့် ကိုယ်တိုင်ရွေးတဲ့လမ်းကိုတော့ ဆရာတော်က နောက်မဆုတ်တမ်းလျှောက်တော့တာပါ။

များသော အားဖြင့် ကင်းတင်းလေးထဲ အရှင်ဆေကိန္ဒမို့ ၀င်လာပြီဆိုရင် ကျောင်းသားတွေက ပြောလက်စ စကားရပ်ပြီး အားလုံးထပေးကြတာပါ။ ဆရာလည်းဆရာမို့ ဓမ္မကထိကလည်း ဓမ္မကထိကမို့ အရိုအသေပေး ကြတာပါ။ ဆရာတော်က “ထိုင်ကြလေကွာ ငါ့လည်း ပစ်မထားကြပါနဲ့ဟ ငါလည်း မင်းတို့လို စကားပြောချင် တာပေါ့ကွာ” ဆိုပြီး ရင်းရင်းနှီးနှီး ၀င်ထိုင်တော့တာပါ။

“နာမည်ကျော်လို့ ဘုန်းကံကြီးပြီဆို ပုန်းအိပ်ရတော့တာပဲ”တဲ့။ ဒီစကားကို အမိန့်ရှိတာက လွန်ခဲ့တဲ့ လအနည်းငယ်ကမှ ထေရ၀ါဒတက္ကသိုလ်ကြီးရဲ့ ဒုတိယပါမောက္ခချုပ်တာဝန်က အနားယူသွားခဲ့တဲ့ ဗန်းမော် ဆရာတော်ကြီးပါ။ ဆရာတော်ကြီးကို နှုတ်ဆက်ကန်တော့ကြတဲ့ ပွဲမှာ မှတ်မှတ်ရရ မိန့်သွားခဲ့တာပါ။ အဲဒီပွဲမှာ အရှင်ဆေကိန္ဒလည်း တက်ရောက်တာမို့ ကိုယ်တွေ့မို့လားမသိဘူး။ တစ်ကိုယ်လုံး တသိမ့်သိမ့် တုန်အောင် ရယ်(ရီ)တော့တာပါပဲ။ ဆရာတော်ကြီးကတော့ ပုံပြင်လေးနဲ့ကို လှအောင် ပြောသွား တာပါ။ နောက်ကြုံရင် ရေးပါဦးမယ်။

ဘုန်းကံကြီးလို့ နာမည်ကျော်ရင်တော့ တံခါးခေါက်သံတွေက အမြဲတမ်းဆူညံနေတော့မှာပါ။
ဒါကြောင့် ဆရာတော်ကြီးတွေက လာဘ်လာဘနဲ့ အခြွေအရံ ကျော်ဇောမှုတွေကို ဒုက္ခလို့ ငြီးလေ့ရှိတာပါ။ အကြောင်းမသိသူတွေကတော့ အဲဒီလို ဒုက္ခမျိုးတော့ သူတော်တို့များ ခံလိုက်ချင်သေး လုပ်ကြတာ နေမှာ..။ အင်း သူတော်တို့စာရင်းထဲမှာ သူများပါနေဦးမလား။

မန္တလေးကန်တော်ကြီးပတ်လမ်းပေါ် သူတို့ကားကြီးမောင်းတက်သွားစဉ်မှာပဲ စစ်ကိုင်းတောင်ရိုးက စေတီ တော်တွေ ဖူးရပါပြီ။သီချင်းသံလေး သဲ့သဲ့လည်း ကြားလိုက်ရပါတယ်။ “ စစ်ကိုင်းတောင် စစ်ကိုင်းတောင် အထက်နားဆီက အရှေ့တလွှားကြည့်လိုက်ပြန်ရင်လေ.........။”

သီတဂူလမ်း(၄)

သာသနာ့တက္ကသိုလ်ဆိုတာက ၆၂ လမ်းမကြီးပေါ် နန်းတော်ရှေ့ရဲ့ လွမ်းမောဖွယ်ရာနေရာမှာ တည်ရှိပါတယ်။ ရွှေနန်းတော်ကျောင်း။ အတုမရှိကျောင်းတော်ကြီး၊ ကမ္ဘာ့အကြီးဆုံးစာအုပ်ကြီးလို့ တင်စားခံရတဲ့ မဟာလောကမာရဇိန်ကုသိုလ်တော်ဘုရား၊ ကနောင်ကိုယ်တော်ကြီးကျဆုံး သွားတဲ့နေရာမှာ အမှတ်တရတည်ထားတဲ့ စန္ဒာမုနိဘုရား၊ ကျောက်တော်ကြီးရုပ်ပွားတော်မြတ်နဲ့ အသက်ကလေးရယ်တဲ့ ရှည်စေလိုရင် သီချင်းရဲ့ ပြယုဂ် မန္တလေးတောင်တော်ကြီးတစ်ဝိုက်မှာ သီးခြားအလှတွေနဲ့ ခမ်းနား လှတဲ့ ကျောင်းတော်ကြီးပါ။

ဒီတက္ကသိုလ်နေ့ရက်တွေမှာ သူ့ဘ၀ကို အများကြီးသွေးပေးလိုက်တဲ့ သင်ခန်းစာတွေရှိခဲ့ပါတယ်။ ရဟန်း ပုဂ္ဂိုလ်ဆရာတော်တွေရဲ့ ထေရ၀ါဒရိုးရာသင်ရိုးတွေကို မှတ်သားခဲ့ရသလို ဥရောပနဲ့ အမေရိကားနိုင်ငံတွေက ယေးလ်လို လန်ဒန်လို တက္ကသိုလ်ကြီးတွေမှာ ပညာသင်ခွင့်ရခဲ့တဲ့ လူပုဂ္ဂိုလ် ဆရာတွေကြီးရဲ့ သိပ္ပံနည်းကျနဲ့ သိပ္ပံနယ်လွန် ဗုဒ္ဓဘာသာတရားဓမ္မတွေကိုလည်း တမေ့ တမော နားထောင်ခွင့်ရခဲ့ပါတယ်။ ဂိုဏ်းဂဏပေါင်းစုံ လူမျိုးပေါင်းစုံရဟန်းတော်တွေ ရဲ့ချစ်ကြည် ရင်းနှီးမှုကို ခံစားနိုင်ခဲ့တဲ့အတွက် ဂိုဏ်းဂဏအစွဲအလမ်းတွေလည်း ကင်းခဲ့ပြန်ပါတယ်။

ကျောင်းတက်ချိန် မနက် ၂ ကြိမ်။ နေ့လည် ၃ ကြိမ်ကလွဲရင် ကိုယ်ပိုင်အချိန်တွေ များလာတဲ့အတွက်
တက္ကသိုလ်စာကြည့်တိုက်နဲ့ နန်းရှေ့ဈေးနားက မို့မို့စာပေ။ စပယ်ဖြူစာပေတို့ကို ဦးတည်နိုင်ခဲ့ပါတယ်။အခြေအနေပေးရင်တော့ မန္တလေး ၈၄ လမ်းမကြီးပေါ်လျှောက်ပြီး နဂါး၊ ရဲရင့်။ ဒေါင်းအိုးဝေ၊ သုခမိန်၊ ဥတ္တရလွင်ပြင်စာအုပ်ဆိုင်တွေနဲ့ ဈေးချိုတော်ရဲ့ စာအုပ်အဟောင်း ဆိုင်တန်းတွေကိုလည်း မွှေခဲ့ဖူးပါတယ်။စာတွေ ဖတ်ဖြစ်ခဲ့တာတော့ သေချာလှပါတယ်။
မန္တလေးရဲ့ ယဉ်ကျေးမှုဇုံထဲမှာ နေခွင့်ရတဲ့အတွက် ကမ္ဘာလှည့်ခရီးသွားတွေနဲ့ စကားလက်ဆုံ ကျဖို့လည်း အခွင့်အလမ်းရခဲ့ပါတယ်။ အထင်ကြီးစရာတော့ မရှိခဲ့ပါဘူး။ “ ရဟန်းဘ၀ရောက်တာ ဘယ်လောက်ကြာပါပြီလဲ” ဆိုတဲ့မေးခွန်းကို '' YES'' လို့ဖြေခဲ့ဖူးတာပါ။(အဟေးဟေး)

ပြီးတော့ သူပေါင်းခဲ့တဲ့ မိတ်ဆွေတွေကလည်း စာပေအသစ်တွေနောက်လိုက်ေ န သူတွေပါ။ ကျောင်းစာသင်ခန်းထဲမှာ မြန်မာစာဘာသာရပ်အတွက် ရှင်ဥတ္တမကျော်ရဲ့ တောလား။ ရှင်အုန်းညို ရဲ့ ဂါထာခြောက်ဆယ်ပျို့၊ ရာဇကုမာရ်ရဲ့ မြစေတီကျောက်စာတွေ သဲသဲမဲမဲ ကူးရင်း ခေတ်အသစ် ကြီးရဲ့ စာပေတွေကို ၆၂ လမ်းမကြီးပေါ်မှာ တိုးတိုးဝှေ့ဝှေ့ ဖတ်ခဲ့ကြတာပါ။

နောက်မျိုးဆက်အသစ်ကို ထိန်းကျောင်းမယ့် ရဟန်းတော်တွေ အနေနဲ့ လူငယ်တွေရဲ့ အမြင်၊ ခံစားမှုတွေနဲ့ အတူ တွဲလျှောက်ရမယ်လို့ ခံယူခဲ့ကြပါတယ်။ ရော့ခ်သီချင်းတွေကိုလည်း လက်လှမ်းမီခဲ့ကြတာပါပဲ။ဥဂ္ဂါသေနသူဌေးသားရဲ့ လိုက်ဖ်ရှိုးမှာ ဘုရားရှင်ကိုယ်တိုင် အားပေးခဲ့သလိုမျိုးပေါ့။ဒီလိုနဲ့ မိတ်ဆွေတွေ စုမိခဲ့ပါတယ်။

သူတို့အဖွဲ့မှာ ကဗျာဆရာရဟန်းတစ်ပါး။ အဲဒီရဟန်းရဲ့ ကဗျာတစ်ပုဒ်ကလည်း မောင်ခိုင်မာရဲ့ ဧည့်ခန်းဆောင် များကို ဖြတ်ကျော်ခြင်းထဲထိ ရောက်သွားလေတော့ မြောက်ချင်စရာပါ။ ဂျူးရဲ့ အမှတ်တရ ကို ဗလာစာအုပ်နဲ့ ကူးရေးဖူးသူမိတ်ဆွေရဟန်းတစ်ပါး။ မောင်ချောနွယ်ရဲ့ မောင်ချောနွယ်အတု နဲ့ ပိုင်စိုးဝေကြီးရဲ့ သိန်းစွန်ငှက်ရဲ့အပြန်လမ်း၊ နေရောင်ခြည်နဲ့တွေ့ဆုံခြင်းကဗျာတွေ အာဂုံဆောင် ထားသူ မိတ်ဆွေရဟန်းတစ်ပါး။ ထွက်လာသမျှ မဂ္ဂဇင်းတွေက ကဗျာတွေကို အက္ခရာဝလိစဉ် ပြီးကူးလေ့ရှိသူ မိတ်ဆွေရဟန်းတစ်ပါး။ ဘာမှဝင်မပြောပေမယ့် ပြောသမျှကို အားရစွာ နားထောင်တတ်တဲ့ မိတ်ဆွေ သုံးလေးပါး။အဲဒီပုဂ္ဂိုလ်တွေက သူ့ထက်စီနီယာကျသလို အတန်းလည်း မတူကြလေတော့ အဲဒီစာပေ အသိုင်းအ၀ိုင်းထဲ တိုးနိုင်ဖို့ သူ့ဝင်ခွင့်စာမေးပွဲမှာ သစ္စာနီရဲ့ “နေထိုင်ခြင်းမိတ္တူ” ကဗျာ ဟာ အသာစီးရခဲ့ပါတယ်။

၆၂လမ်းပေါ်က လက်ဘက်ရည်ဆိုင်ယိုင်ယိုင်လေးမှာ။ အတုမရှိကျောင်းတော်ကြီးရှေ့ ကြာပွင့်ကြီးရဲ့ လပြည့်ညတွေမှာ သူတို့ စကားဝိုင်းတွေ လှခဲ့ဖူးတယ်။ သရဖူနဲ့ ဟန်သစ်မဂ္ဂဇင်းတွေကို အပိုင်ဝယ်ပြီး တာရာမင်းဝေ ၊မင်းခိုက်စိုးစံတို့ရဲ့ ခြေလှမ်းကို စောင့်ကြည့်ခဲ့ကြဖူးသလို နီကိုရဲရဲ့ မကြည်ပြာဖြစ်လိုက် မသီတာဖြစ်လိုက် ကျွန်တော့်ဘ၀အချစ်အကြောင်းကိုလည်း ဘယ်လောက် ထိထွက်လာနိုင်မလဲ စိတ်ဝင်စားခဲ့ကြဖူးပါတယ်။

လေးဖြူရဲ့ အလင်းရောင်နဲ့ မူရင်းသီချင်း Dream on ဘယ်ဟာပိုကောင်းသလဲကိစ္စကိုတော့ အတည်ပြုချက်မရခဲ့ကြဘူး။ကိုယ့်စာမျက်နှာကိုယ်လှန်ပြီး အနာဂတ်သာသနာဆိုတဲ့ ခေါင်းစဉ်နဲ့ ပိဋကတ်စာမျက်နှာတွေထဲ တိုးဝင်ရင်း ဆွေးနွေးခဲ့ကြဖူး သဘောထားလည်းကွဲလွဲခဲ့ကြဖူးလေရဲ့။

အော် ဘာပဲဖြစ်ဖြစ် တက္ကသိုလ်ကြီးက ပိုပြီးလှနေခဲ့ပါပြီ။
တက်သစ်စ ကထိက နည်းပြတွေရဲ့ အတွေးသစ်နဲ့ နိုင်ငံတကာအမြင်တွေက ဖန်တီးလိုက်ကြတာပါ။
သူကျောင်းသားဘ၀က တက္ကသိုလ်စာကြည့်တိုက်နဲ့ မော်ကွန်းထိန်းရုံးကလွဲရင် ကွန်ပြူတာဆိုတာ သရဲတစ်ကောင်လို ရှားခဲ့ပေမယ့် ခုတော့ အင်တာနက်ခန်းမမှာ မျိုးဆက်သစ်ရဟန်းငယ်တွေက စုစုရုံးရုံး။

အဲဒီညနေက အချက်ပေးဟွန်းသံကြောင့်သာ ထွက်လာခဲ့ရတယ်။
နာရီစင်ကြီးရှေ့မှာ ရပ်ပြီး ငေးချင်နေတုန်း။

သီတဂူလမ်း (၃)

မဟာမုနိရုပ်ရှင်တော်မြတ်ပရိဝုဏ်ကအပြန် စစ်ကိုင်းကိုမ၀င်မီ မန္တလေးသာသနာ့ တက္ကသိုလ်က လည်း သီတဂူညီလာခံဧည့်သည်တော်တော်တွေကို ဖိတ်ကြားထားပါသတဲ့...။ သူ ၀မ်းသာသွား ပါတယ်။ လွန်ခဲ့တဲ့ နှစ်ဆယ်ရာစုနောက်ဆုံးနေ့တွေထဲ ဖြတ်သန်းခဲ့တဲ့ တက္ကသိုလ်တံခါးဝကို ဆယ်စုနှစ် တစ်ခုနီးပါးကြာမှ ပြန်ဝင်ရဦးမယ်။

ဟိုတုန်းကလို ကျောင်းခေါ်ချိန်နောက်ကျလို့ ခိုးကြောင်ခိုးဝှက် ချောင်ကပ်ဝင်ရတဲ့ ကျောင်းသားတစ်ယောက် မဟုတ်တော့ဘူးပေါ့။ ခုတော့ သူက ထေရ၀ါဒ တက္ကသိုလ်များညီလာခံမှာ ခပ်တည်တည် (မိတ်ဆွေများပြောသလို မယောင်မလည်) ကိုယ်စားလှယ်အဖြစ်တက်ရောက်မယ့်သူ ဖြစ်နေပါရောလား။

နန်းတော်ရှေ့ ၆၂ လမ်းကို ချိုးကွေ့ဝင်လိုက်ရုံနဲ့ သူ့စိတ်တွေက လတ်လတ်ဆတ်ဆတ် ဖြစ်သွားတယ်။ လင်းလက်နေတဲ့ တက္ကသိုလ်မုခ်ဦးဝကြီးထဲ တိုးဝင်ခိုက်မှာပဲ သူဝေဒနာက္ခန္ဓာတွေလည်း လင်းသွားခဲ့ပါတယ်။ မိတ်ဆွေတွေရဲ့ အော်ဟစ်နှုတ်ဆက်သံတွေကို မြတ်နိုးစွာ သိမ်းပိုက်မိပါရဲ့။

သူ့ Same Batch တွေက ဒီတက္ကသိုလ်မှာ နည်းပြနဲ့ ကထိကဆရာတော်တွေအဖြစ့်  မိတ်ဆွေများကိုယ်တိုင်ကြောက် ခဲ့တဲ့ စာသင်ခန်းတွေထဲ ပြန်ဝင်ပျော်မွေ့နေကြလေရဲ့။ ကျောင်းတက်ချိန်တုန်းက စာသင်နှစ်တွေ တစ်နှစ်ပြီး တစ်နှစ်သာ ကုန်သွားတယ် ခုဆရာဖြစ်နေကြတဲ့ မိတ်ဆွေရဟန်းတော်တစ်ချို့ ကို သူ စကားမပြောလိုက်ရဘူး။ ခုတော့ မိတ်ဟောင်းဆွေဟောင်းတွေအဖြစ် သွေးနီးသွားသလို ခံစားကြရပြီ..။ အားလုံးရဲ့ နှုတ်ဆက်အပြုံးတွေကို တစ်ခုချင်းလိုက်ကောက်လို့ မမီတော့ဘူး။

သူတက်ခဲ့တဲ့ တက္ကသိုလ်ရာသီတွေမှာ သူက အုပ်စုတစ်ခုထဲ အခိုင်အမာ ရောက်သွားခဲ့ပါတယ်။ စာအုပ်စာပေတွေ အပြိုင်ဖတ်ပြီးငြင်းကြခုန်ကြဆွေးနွေးကြတဲ့ အုပ်စုပါ။ ဒီလိုနဲ့စာမေးပွဲရမှတ်တွေ လျော့လျော့သွားတာပါ။

ပထမနှစ် လေးဘာသာဂုဏ်ထူး

ဒုတိယနှစ် သုံးဘာသာဂုဏ်ထူး

တတိယနှစ် နှစ်ဘာသာဂုဏ်ထူး

နောက်ဆုံးနှစ် တစ်ဘာသာဂုဏ်ထူး

(တက္ကသိုလ်မှာ ရှိတဲ့ ဘာသာတွေက မေဂျာသုံးဘာသာ မိုင်နာလေးဘာသာပါ)

အဲဒါတွေက

၁။ ၀ိနည်း

၂။သုတ္တန်

၃။အဘိဓမ္မာ

၎။ပါဠိ

၅။မြန်မာစာ

၆။အင်္ဂလိပ်

ရ။ဗုဒ္ဓဒေသနာပြန့်ပွားရေးဘာသာ(ဗုဒ္ဓ၀င်ဆိုင်ရာသမိုင်း၊ ဒဿနနှင့် ပထ၀ီဘာသာ)

သူဂုဏ်ထူးထွက်လေ့ရှိတဲ့ ဘာသာတွေက မေဂျာဘာသာတွေများပါတယ်။ ပထမဆုံးနှစ်ကဆို သူ့မိတ်ဆွေတွေ အံ့အားသင့်သွားဖူးပါတယ်။ ) မေဂျာတွေချည်း ဂုဏ်ထူးထွက်လို့ပါ။ (ကြွားတယ်လို့ ထင်ချင်ရင်လည်း ဖော့ပြီး ထင်ကြပါ) သူဂုဏ်ထူးမထွက်တာက အမှတ် (၅) နဲ့ အမှတ် (၇) ဘာသာရပ်တွေပါပဲ။ အမှတ်(၆)ဘာသာ အင်္ဂလိပ်စာကတော့ ဂုဏ်ထူးထွက်ပေးဖို့မသင့်ဘူးလို့ စဉ်းစားထား တာမှန်ပါတယ်။ ခုရေတွင်းတူး ခုရေကြည်သောက်အင်္ဂလိပ်စာ အဆင့်အတန်းက ဘယ်မှာ အဆင်ပြေမှာတုန်း။ မေးထားတဲ့ မေးခွန်းကို ဖြေနိုင်လို့ ဂုဏ်ထူးထွက်မယ်ဆိုရင်တော့ သူ့နာမည်ကို ချန်ထားလို့ရမှာ မဟုတ်ဘူးပေါ့။(တော်လို့မဟုတ်ပါ..;) ဓမ္မာစရိယအဆင့်အတန်းရှိတဲ့ ကျောင်းသားတွေအတွက် အင်္ဂလိပ် သဒ္ဒါဆိုင်ရာမေးခွန်းတွေက လွယ်နေလို့ပါ။တက္ကသိုလ်ပထမနှစ်မှ အင်္ဂလိပ်စာ ကကြီးခခွေး သင်ကြရတာကိုး။

တက္ကသိုလ်ပထမနှစ်မှာ အင်္ဂလိပ်စာသင်ပုန်းကြီးစာအုပ်တွေ ဝေပေးပါတယ်..။ အဲဒီ သင်ပုန်းကြီးစာအုပ်လေးတွေ ၀ှက်ပြီး လူလစ်မှ ခိုးခိုးကျက်ကြရတာပါ..။ အဲဒီလို စာအုပ်လေးဝှက်ထားတဲ့ ကြားထဲက မိတ်ဆွေရဟန်းတစ်ပါးကတော့ လူမိသွားပါသေးတယ်..။

မိတ်ဆွေရဟန်းကို ကြည်ညိုတဲ့ မိသားစုတစ်စုက တက္ကသိုလ်အခန်းကို လာလည်ပါတယ်.။ ပထမတန်းအရွယ်ကလေးငယ်လေးတွေကလည်း မျောက်ရှုံးအောင် ဆော့ကြ..။ မိတ်ဆွေရဟန်းရဲ့ စာအုပ်စင်ကို ဖွကြနဲ့ နောက်ဆုံးတော့ ပထမတန်းဖတ်စာအုပ်လေးတွေ့သွားကြပါတယ်..။ကလေးငယ်တစ်ယောက်က ''ဘုန်းဘုန်းဖတ်တဲ့ စာအုပ်ကလည်း သားသားတို့နဲ့ တူတူပဲ '' တဲ့..။ ;)

ဘာပဲဖြစ်ဖြစ် တကယ်ကြိုးစားလိုက်တော့လည်း တက္ကသိုလ်ပညာသင်လေးနှစ်အတွင်း ခရီးပေါက်သွားတဲ့ရဟန်းတော်တွေ မနည်းပေဘူး..။

သူရေးနေကျမြန်မာစာကို ပါရာယန၀တ္ထုနဲ့ ဇိနတ္ထပကာသနီစကားပြေလွှမ်းမိုးခံထားရတဲ့ ဆရာက သိပ်ဘ၀င်မကျလှပါဘူး။ သမိုင်းဆရာကတော့ သက္ကရာဇ်တွေကိုပဲ အမှတ်ပေးချင်လေတော့ သင်ခန်းစာတွေကို တွေးပြီးရေးတတ်တဲ့ သူ့အဖြေလွှာမှာ အမှတ်စာရင်းတွေ နည်းသွားတာပါ။ ခုဆရာတွေ ပြန်တွေ့တော့ ရာစုအသစ်ကြီးထဲ ဘာတွေ ပေးရမယ်ဆိုတာ သိနေကြပြီဆိုတာ နားလည်နေခဲ့ပါတယ်။

သူစာကျက်တာ မမြင်ဖူးတဲ့သူ့မိတ်ဆွေတွေလောကမှာတော့ ဉာဏ်ကောင်းတယ်ဆိုတာမျိုးလည်း နာမည်ထွက်ခဲ့ဖူးပါတယ်။

၂၀၀၀ ခုနှစ်အလွန် ထေရ၀ါဒတက္ကသိုလ်တက်ခဲ့တဲ့အချိန်မှာတော့ မိတ်ဆွေရဟန်းတစ်ပါးရဲ့ မှတ်ချက်စကားကြောင့် ပြုံးမိရပါသေးတယ်။“ ဉာဏ်ကောင်းတယ်လို့ နာမည် ကြီးပြီ ဆိုရင်တော့ ညည အိပ်ရေးပျက်ပြီသာ မှတ်ပေရော”တဲ့။ စာခိုးကျက်ရတာလို့ ပြောချင်တာပါ..။

ဘာပဲဖြစ်ဖြစ် ခုတစ်ခေါက်ရောက်ချိန်မှာတော့ မိတ်ဆွေတွေရဲ့ နှုတ်ခွန်းဆက်သံတွေကြားထဲ သူမျောပါခဲ့ရဲ့။ ကထိကနဲ့ နည်းပြဆရာတော်ကြီးတွေက သူ့မိတ်ဆွေတွေဆိုပဲ။ တကယ်တော့ သူလည်း မိတ်ဆွေရဟန်းတို့ အမြင်မှာ တစ်ခုခုဖြစ်နေလေသလား( ဖတ်မိတဲ့ ငါ့ရှင်တို့ရေ ဘွာတေး) မစ္စတာ ဖရီးမင်းရေ ခင်ဗျားပြောတဲ့ The World Is Flat. ကမ္ဘာကြီးပြားသွားပြီဆိုတာ လက်ခံလိုက်ပြီ။ ကစားကွင်းက ပြင်ညီသွားပြီပေါ့။

သီတဂူလမ်း(၂)

ထေရ၀ါဒတက္ကသိုလ်မှာ မဟာတန်းတက်ခဲ့စဉ်က သူ့ရဲ့ မေဂျာပါမောက္ခဖြစ်ခဲ့ဖူးတဲ့ ကျိုက္ကလော့ဆရာတော်ဒေါက်တာအရှင်စန္ဒာဝရာဘိဝံသကအပါအ၀င် သူက အခြားပါမောက္ခ၊ ကထိက ၊ နည်းပြ ရဟန်းပုဂ္ဂိုလ် လူပုဂ္ဂိုလ်ဆရာဆရာမတွေနဲ့ ရင်းရင်းနှီးနှီးပါ။ စာကြည့်တိုက်တွေ စာသင်ခန်းတွေကြား လမ်းသလားခဲ့ဖူးတာကိုး။ အတန်းစုံမှာလည်း မိတ်ဆွေတွေ ရှိသလို နောက်တက်လာတဲ့ ဂျူနီယာတွေကိုလည်း ဆရာလုပ်ဖို့က ၀ါသနာပါခဲ့သေးတာပေါ့။

ရန်ကုန်-မန္တလေးအမြန်လမ်းမကြီးပေါ်က ဟိုင်းဝေးဘတ်စ်ကားကြီးပေါ်မှာ မိတ်ဟောင်းဆွေ ဟောင်းတွေ ဆရာ ဆရာမတွေ ပြန်ဆုံတွေကြ၊ တသောသောရယ်မောကြ ကြည်နူးစရာခရီး တစ်ခုဖြစ်ခဲ့ပါတယ်။ လမ်းစဉ်တစ်လျှောက်မှာလည်း သီတဂူဆရာတော့်ဘုန်းရိပ်မှီရလို့ ကြိုဆို ဧည့်ခံရေး တွေက နွေးနွေးထွေးထွေး စောင့်နေခဲ့ကြတာပါ။

ပဲခူးအလွန်တစ်နေရာမှာ နံနက်စာ။
တပ်ကုန်းမှာက နေ့လည်စာ။
ရမည်းသင်းမှာတော့ အချိုပွဲ။

မန္တလေးမဟာမြတ်မုနိဘုရားကြီးပရိဝုဏ်ထဲကို ကြိုဆိုရေးအဖွဲ့က ကမ်းပေးတဲ့ သစ္စာပန်းစည်း လေးကိုင်ပြီး လျှောက်မိတော့ လွန်ခဲ့တဲ့ဆယ်စုနှစ်ဆီက မန္တလေးစာသင်သားဘ၀ စာဝါပိတ်ချိန် (ကျောင်းပိတ်ချိန်)တွေကို ပြန်လွမ်းမိတော့တာပါ။

၁၉၉၀ ပြည့်လွန်မစိုးရိမ်တိုက်သစ်ကြီးရဲ့ တုန်းမောင်းခေါက်သံတွေ ပြန်မည်လာခဲ့ပါတယ်။အဲဒီစာ သင်သားဘ၀နေ့ရက်တွေမှာတော့ စာဝါချိန်တွေက မလွန့်သာအောင်ပိတ်ဆို့ထားလေတော့ တစ်ရက်လေးသာ နားခွင့်ရလေတဲ့ ဥပုသ်နေ့တွေကို စာတွေအော်ကျက်ရင်း ဘုရားရှိခိုးရင်း ပြက္ခဒိန်ကြည့်စရာမလိုပဲ သိနေတော့တာပါ။

အဲဒီ ဥပုသ်နေ့တွေမှာ ၀ယ်စရာရှိရင် ဈေးချိုကို ပြေးရမယ်။ စာတိုပေစ ရေးထားတာလေးတွေကို ဘုရားကြီးစာတိုက်သွားထည့်မယ်။အဲဒီရှားရှားပါးပါး ဥပုသ်နေ့လေးက ရုံးပိတ်ရက်ဖြစ်နေရင်တော့ နောက်တစ်ပတ်စောင့်ပေဦးပေါ့။ အထွေအထူးလုပ်စရာမရှိလည်း အဲဒီဥပုသ်နေ့တွေမှာတော့ ကျောင်းနဲ့ဝေးနိုင်သမျှဝေးအောင်သွားတော့တာပဲ..။ ဆရာသမားတွေအချုပ်အနှောင်က လွတ်ရာပြေးတော့တာပဲပေါ့။ ဒါ ကိုယ်ပိုင်အခွင့်အရေးပဲ။ ဒီလိုနဲ့ ကိုရင်လေးတွေ ဦးဇင်းလေးတွေ တူရာတူရာပေါင်းပြီး မန္တလေးမြို့ကြီးကို ပန္နက်ပြန်ချကြတော့တာပါ။

အမရပူရက ဦပိန်တံတားပေါ်မှာ။ မန္တလေးတောင်ပေါ်က မြွေကြီးနှစ်ကောင်ဘေးမှာ ။ တစ်ချို့ကိုယ်တော်လေးတွေကတော့ ရန်ကင်းတောင်လို စစ်ကိုင်းတောင်လို ဝေးဝေးလံလံတွေအထိ ခြေဆန့်ကြတော့တာပဲ။ဥပုသ်နေ့က သူတို့နေ့ပဲဆိုတာကို နာယကဆရာတော်ကြီးတွေ ကိုယ်တိုင်က အသိအမှတ်ပြုထားတာပါ။ ကျန်တဲ့နေ့တွေဆို သင်ရိုးညွှန်းတမ်းစာအုပ်က လွဲရင် အခြားစာအုပ်တွေ လက်ဝယ်တွေ့လို့ မရဘူး။ စာအုပ်အသိမ်းခံရလို့ ငှားနေကျ ဗေဒါလမ်းစာအုပ် ဆိုင်လေးမှာ စာအုပ်ဖိုးလျော်ရတာလည်း မှတ်မိနေသေးတယ်။ အဲဒီဥပုသ်နေ့မှာတော့ ဆရာတော်ကြီးကလည်း ဘာစာအုပ်ဖတ်ဖတ် မပြောတော့ဘူး။ တစ်နေကုန်အိပ်နေလည်း အပြစ်မတင်ဘူး။

အပြင်ထွက်ခွင့်တစ်နေကုန်ရပေမယ့် ညနေ ၆နာရီဘုရားရှိခိုးချိန်ကိုတော့ အမီရောက်အောင် လာရမယ်။ ဘုရားရှိခိုးပျက်ရင်တော့ ဒဏ်တွေလာပါပြီ။ မစိုးရိမ်းတိုက်သစ်ကြီးရဲ့ ဒဏ်ကလည်း လှပါတယ်။ စာကျက်ရတာပါ။ ကိုယ်ပိုင်အချိန်နဲ့ ကိုယ်ပိုင်လွတ်လပ်ခွင့်ကို ရုတ်သိမ်းလိုက်တာပါ။

နေ့စဉ်နေ့တိုင်း နေ့ဆွမ်းစားပြီးချိန်( ၁၂း၀၀-၀၁း၀၀ နာရီ) ဟာ စာသင်သားတွေ တစ်နေကုန် စာကျက်နိုင်ဖို့ အနားယူခွင့်ပေးထားတာပါ။ အဲဒီအချိန်မှာ သင်္ကန်းခေါင်းမြီးခြုံပြီး ငြိမ်ငြိမ်ဆိတ်ဆိတ် ကျိန်းစက်ကြရတာပါ။ စကားမပြောရ မဆူရပါဘူး။ စကားပြောမက်တဲ့ကိုယ်တော်တွေကတော့ ကျောင်းရှေ့က သစ်ပင်တွေအောက်ကို ပြေးကြရတာပါ။

တစ်ချို့ အချိန်ကို တန်ဖိုးထားတဲ့ ကိုယ်တော်လေးတွေကတော့ အဲဒီကိုယ်ပိုင်အချိန်လေးမှာ ကျောင်းအပြင်ထွက်ပြီး လောကီပညာတစ်ခုခု သင်တော့တာပါ။ ကျောင်းပေါက်ဝမှာလည်း သင်တန်းအမျိုးမျိုးကြော်ငြာတွေကလာကပ်ထားပါတယ်။အင်္ဂလိပ်စကားပြေသင်တန်း။စက်ချုပ်သင်
တန်း။ တိုင်းရင်းဆေးသင်တန်း ဗေဒင်သင်တန်းအစ နောက်ဆုံး ဗန်တိုဗန်ရှည်သိုင်း ကရာတေးသိုင်းသင်တန်းတွေအထိ စုံပါတယ်။ စရိုက်ကလည်းအစုံဆိုတော့ အမျိုးမျိုးကြုံရတာပါပဲ။

အဲ ဒဏ်ကျတဲ့ ကိုယ်တော်ကတော့ အဲဒီအချိန်မှာ စာအုပ်တစ်အုပ်ကိုင်ပြီး နာယကဆရာ တော်ကြီးခြေရင်းသွားပြီး စာကျက်ရတော့တာပါ။ သူများနားလို့ မနားရတော့ပါဘူး။ ဒဏ်ကျစာသင်သားတွေကလည်း ညစ်ကျယ်ကျယ်တွေဆိုတော့ စာကို သံပြိုင်အော်ကျက်ကြတာပါ။ ဆရာတော်ကျိန်းမရအောင်ပေါ့။ ဆရာတော်ကြီးကလည်း ပါရမီထူးပါတယ်။ မင်းတို့စာအော် ကျက်လေ ငါအိပ်ပျော်လေလုပ်တာပါ။ စာသင်သားတွေရဲ့ စာကျက်သံတွေကို့ ရစ်သမ်ဖြစ်နေတဲ့ ပရိယတ္တိပျော်ဆရာတော်ကြီးပါ။ အခုမန္တလေးမြို့က မစိုးရိမ်တိုက်ကြီးသုံးတိုက်ရဲ့ အဓိပတိ မဟာနာယကဆရာတော်ကြီး အရှင်ရာဇဓမ္မာဘိဝံသဖြစ်ပါတယ်။ ပစ်မှားမိသမျှ ၀န်ချဦးခိုက် ပါတယ်ဘုရား။

ပြောရရင်တော့ မျက်နှာပူပါတယ်။ အဲဒီဒဏ်က တစ်ပတ်ဒဏ်၊ နှစ်ပတ်ဒဏ်။ တစ်လဒဏ်စသည် သတ်မှတ်ထားတာပါ။ တစ်လဒဏ်တွေ ဆက်လာပြီဆိုရင်တော့ ရာသက်ပန်ဒဏ်အဖြစ် တိုးမြှင့် လိုက်တော့တာပါ။ တိုက်ပိတ်လိုက်တဲ့ သဘောပါပဲ၊ ကျောင်းတိုက်မှာ နေသမျှကာလပတ်လုံး နေ့လည်ပိုင်း ကိုယ်ပိုင်အချိန်လေး စတေးလိုက်ရတော့တာပါ။ ရာသက်ပန်ဒဏ်က ကျောင်းက ထွက်သွားပြီး နောက်တစ်ခါ မျက်စိလည်ပြန်ရောက်လာရင်လည်း အသက်ဝင်ပါသတဲ့။ အဟဲ နောက်တစ်ခါ ကျောင်းအရိပ်မခိုတော့ပါဘူးဘုရား။ လက်ကျန်လေးတွေ ရှိနေသေးလို့ပါ။

ဘုရားရှိခိုးမမီမှာ စိုးတဲ့ စာသင်သားအများစုကတော့ ပြန်လို့လွယ်ကူတဲ့ ဘုရားကြီးကို သွားပါတယ်။ ကားခမရှိလည်း ခြေလျင်သုတ်လို့ရတဲ့ အကွာအဝေးမှာ ရှိတာကိုး။ ၄၁ လမ်းမကြီးပေါ်က နေပူကြဲကြဲနေ့တွေအမှတ်ရစရာပဲ။ ဘုရားကြီးရောက်လို့ ဘုရားပရိဝုဏ်ထဲ တစ်ပတ်ပတ်ပြီးရင် လိပ်ကန်ဘေးမှာ တစ်နေကုန် ထိုင်တော့တာပါ။ ဘာရယ်ကို မဟုတ်ဘူး ။ လွတ်လပ်ခွင့်လေးကို တရှိုက်မက်မက်ခံစားတာပါပဲ။

ပြောရင်းနဲ့ လွမ်းသွားတာ အဆိုတော်အငဲရဲ့ “တစ်ခါတုန်းက မန္တလေး” ဟာ ရဟန်းတစ်ပါးနဲ့လည်း ဆိုင်နေပြန်ပါရောလား။ ဒါပေမယ့် ရိုမန္တိက(Romantic)စာမျက်နှာတွေတော့ ပန်းရောင် မလွှမ်းခဲ့ဘူးပေါ့လေ။

သီတဂူလမ်း

ဒိုင်ယာရီစာမျက်နှာ အဟောင်းတွေကို လှန်မိတော့ တောက်တောက်ပပနေ့တွေကို ကောက်ယူ မွှေးမိပြန်ပါတယ်။သီတဂူကြောင့် မွှေးရတာပါ။ သူကတော့ သီတဂူစိုက်တဲ့ ပန်းတွေကြား ၀င်ပွင့်ခွင့် ရလိုက်တာပါ။ မတ်လရဲ့ အစောပိုင်းနေ့တွေဟာ သီတဂူဆရာတော်ကြီးမွေးနေ့ ပွဲတော်အမီ လှပနေခဲ့ပါတယ်။ သာသနာ့အလံတော်တွေ၊ သီတဂူအထိမ်းအမှတ်တံခွန်တွေ ၊ နိုင်ငံတကာရောင်စုံ သင်္ကေတတွေက စစ်ကိုင်းတောင်တစ်ရိုး တလူလူလွင့်နေခဲ့ပါရော့။ ဆွမ်းဦးပုညရှင်ဆီက ဆည်း လည်းသံတွေကို ကြားကြားသမျှ အားလုံးက သိမ်းပိုက်မိကြပေါ့။

သီတဂူဆရာတော်ကြီးရဲ့ ၇၂ ပြည့်မွေးနေ့တော်မှာ အမှတ်တရတွေ မော်ကွန်းထိုးဖို့ အများသား..။
၁။သီတဂူကမ္ဘာ့ဗုဒ္ဓတက္ကသိုလ်ကြီးရဲ့သန္တိမဟာဘွဲ့နှင်းခန်းမကြီးဖွင့်ပွဲနဲ့တွဲပြီးသီတဂူကမ္ဘာ့ဗုဒ္ဓတက္က
သိုလ်ပထမဆုံးအသုတ် ၀ိဇ္ဇာတန်းပညာသင်တွေကို B.A ဘွဲ့နှင်းအပ်ကြမယ်။
၂။သီတဂူဆရာတော်ကြီးကို ထိုင်းဘုရင့်နိုင်ငံတော် Mahamakut University က ဂုဏ်ထူးဆောင် ပါရဂူဘွဲ့ဆက်ကပ်ကြမယ်၊
၃။သီတဂူဆရာတော်ကြီးရဲ့ အမွေ့လျော်ဆုံးဆန္ဒတော်နဲ့ ဖန်တီးခဲ့တဲ့ (Association of Theravada Buddhist Universities) အပြည်ပြည်ဆိုင်ရာထေရ၀ါဒတက္ကသိုလ်များအဖွဲ့ကြီးရဲ့ ဒုတိယမြောက် ညီလာခံကိုကျင်းပကြမယ်ပေါ့။

သီတဂူဆရာတော်ကြီးက အိန္ဒိယကို မမေ့ခဲ့ဘူး။ တကယ်တော့ အိန္ဒိယကိုသာမဟုတ်ဘူး။ မျိုးဆက်သစ်တွေကို သူ့နေ့စွဲထဲ ထည့်ရေးခဲ့တာပါ။ ဆရာတော်ကြီးက အိန္ဒိယကို တစ်နှစ်တစ်ခေါက်တော့ ရောက်လာလေ့ရှိပါတယ်။ အိန္ဒိယနိုင်ငံတက္ကသိုလ်အသီးသီးမှာ ပညာသင်နေတဲ့ရဟန်းတွေ (ဒီနှစ်ဆို သုံးရာကျော်လောက်ရှိပါတယ်) အတွက် တစ်နှစ်လျင် အမေရိကန်ဒေါ်လာ ၁၀၀ စီ လှူဒါန်းလေ့ရှိပါတယ်။

“မင်းတို့ရတာတော့ တစ်ရာပေါ့ကွာ ငါ့မှာတော့ သုံးသောင်း ”ဆိုတာမျိုးခပ်ရွှင်ရွှင်လည်း မိန့်လေ့ရှိပါတယ်။ ဘာပဲဖြစ်ဖြစ် ဆရာတော့်စကားနာကြားခွင့်ရတာကိုက ကံထူးခြင်းတစ်မျိုးပါ။ ပြီးတော့လည်း သီဟိုဠ်ကျွန်းကိုလည်း ဆရာတော်က ကြွလေ့ရှိပါသတဲ့။ သီဟိုဠ်မှာ ပညာသင်နေတဲ့ရဟန်းတော်တွေကိုလည်း ဆရာတော်က မှတ်မှတ်ရရရှိခဲ့ပါတယ်။

ဒီတော့ ဆရာတော်ရဲ့ မွေးနေ့မင်္ဂလာနဲ့ တွဲဖက်ထားတဲ့ နိုင်ငံတကာပွဲမှာ မဇ္ဈိမနဲ့ သီဟိုဠ်ကို ပွဲထုတ်တော့တာပါပဲ။ “အိန္ဒိယက ပညာသင်ရဟန်းတော် ဆယ်ပါး။ သီရိလင်္ကာက ပညာသင်ရဟန်း တော်ဆယ်ပါး ကြွလာစေ”တဲ့။ဆရာတော်ကိုယ်တိုင်လက်မှတ်ထိုးထားတဲ့ ဂုဏ်ယူဖွယ်ဖိတ်စာမှာ မျိုးဆက်သစ်ရဟန်းတော်တွေ အားသစ်ခဲ့ကြပေါ့။

အဲဒီဖိတ်စာဟာMMWAI(အိန္ဒိယနိုင်ငံလုံးဆိုင်ရာမြန်မာပညာသင်ရဟန်းတော်များသာယာဖွံဖြိုးရေး
အဖွဲ့) ကြီးရဲ့ အသက်သွင်းရွေးချယ်မှုနဲ့ သီဟပူရ(Singapore)မှာ ကျောက်ချနေတဲ့သူ့အတွက် လည်း အကျုံးဝင်ခဲ့ပါတယ်။အိန္ဒိယကို ကိုယ်စားပြုမယ့် ရဟန်းတော်ဆယ်ပါးထဲ သူလည်း စာတမ်းတစ်စောင်ဖတ်ဖို့ ခပ်သုတ်သုတ်ကြိုးစားလို့ ချန်ဂီလေဆိပ်ကနေ ပိုးသားလေကြောင်း(Silk Air)နဲ့ အမြန်ပြန်ခဲ့တယ်..။

လေယာဉ်ပေါ်မှာ မှတ်မှတ်ရရတွေ့ခဲ့ရတဲ့ ကမ္ဘာ့ဗုဒ္ဓစာပေပညာရှင်ကြီး ဒေါက်တာဂုဏရတနကို မသိနိုးနား ရင်းရင်းနှီးနှီး နှုတ်ဆက်ခဲ့မိသေးရဲ့။ ညီလာခံတက်ကြမယ့်သူအချင်းချင်းပေါ့..။ပြီးမှ မျက်နှာပူရတယ်..။ ညီလာခံမှာ ဆရာတော်ကြီးက သဘာပတိထိုင်ခုံမှာ မိန့်မိန့်ကြီးသီတင်း သုံးလို့..။ ဆရာတော်ကြီးက အမေရိကားမှာ နှစ်ရှည်လများနေထိုင်သာသနာပြုနေတဲ့ ကျမ်းပြု သီဟိုဠ်ဆရာတော်ကြီးပါ။

ဘာပဲဖြစ်ဖြစ် မတ်လအစောပိုင်းရက်တွေအမီ စစ်ကိုင်းရဲ့ သံချောင်းခေါက်သံတွေဆီ သူ့ခြေလှမ်း တွေ သွက်ခဲ့ပါတော့တယ်။

မတ်လ(၄)ရက် ရန်ကုန်က ထွက်ခွာ...ရန်ကုန်အပြည်ပြည်ဆိုင်ရာထေရ၀ါဒဗုဒ္ဓသာသနာပြု တက္ကသိုလ်မုခ်ဦးဝက ကားစထွက်တော့ နံနက်၃း၃၀ နာရီ..။
ပါမောက္ခ၊ ကထိကဆရာတော်တွေ၊ လူပုဂ္ဂိုလ်ပါမောက္ခ၊ ကထိကဆရာ ဆရာမတွေနဲ့အတူပေါ့။
သူကတော့ သီတဂူဆရာတော်ရဲ့ ဖိတ်ကြားစာရင်းမှာ ပါသော်လည်း “ ကိုယ့်အစီအစဉ်နဲ့ ကိုယ်ကြွ ကုန်ကျစားရိတ် စစ်ကိုင်းမှာထုတ်ယူ”ဆိုတဲ့သီတဂူမိတ်ဆွေပါမောက္ခတစ်ချို့ရဲ့ အကြောင်းပြန်ချက် ကြောင့် ကားလက်မှတ်အဆင်သင့်ဖြတ်ထားပေမယ့် အဖော်ကောင်းလို့ ထေရ၀ါဒခရီးစဉ်ထဲ ရောပါမိပါရော။