အဖေလို့သာ ခေါ်ပါလေ သားရဟန်း
(၁)
“ကိုယ်တော့်အမေကတော့ ဖုန်းတမျှော်မျှော်နဲ့ပြောမဆုံးတော့ဘူး၊
အမေ့ဆီကိုမဖြစ်မနေဖုန်းဆက်ပါ မောင်ပဉ္ဇင်း”
“ဟုတ်ကဲ့ ဆက်လိုက်ပါ့မယ် ဒကာကြီး”
“အဖေလို့ ခေါ်စမ်းပါ ဦးဇင်းရယ်”
“ ဟုတ်ပြီဗျို့ အမေ့ဆီကို ဖုန်းဆက်လိုက်ပါ့မယ် အဖေ”
လွန်ခဲ့သောသောကြာနေ့ဆီက သူ့ဖခင်ကြီးနှင့် ပြောဖြစ်ကြသော တယ်လီဖုန်းစကားအပိုင်းအစအချို့ပင်ဖြစ်ပါ သည်။ မြစ်ဝကျွန်းပေါ်မြို့လေးမှာ အခြေချနေသည့် သမီးငယ်နှင့် မြေးများကို တွေ့ရန် အညာကျေးလက်မှ အလည်အပတ် ရောက်နေသည့် ဖခင်ကြီးထံ ဖုန်းဆက်ရာမှ ဒကာကြီးဟု ခေါ်မိသောသားရဟန်းကို “ အဖေလို့ ခေါ်စမ်းပါ ဦးဇင်းရယ်”တဲ့။
သာသနာတော်အတွက် သားတစ်ယောက်လုံး လှူဒါန်းခဲ့ရှာသော ဖခင်တစ်ဦး၏ ပါးလျ သေးသွယ်သော တောင့်တမှုလေးသာ ဖြစ်ကြောင်း သူကောင်းကောင်း နားလည်လိုက်ပါသည်။
“ဦးဇင်းအနေနဲ့ သာသနာတော်မှာ နေသမျှ ဒကာကြီးတို့ ခမည်းတော်တို့ ဆိုတာ လူတိုင်းကို ခေါ်ခွင့်ရှိတယ်။ တပည့်တော်ကတော့ သာသနာ့ဝန်းထမ်း ရဟန်းတစ်ပါးကို မွေးခဲ့ရတဲ့ ဖခင်တစ်ယောက်အဖြစ်နဲ့ ဦးဇင်းရဲ့ အဖေလို့ခေါ်တဲ့အသံကိုပဲ ကြားချင်ပါတယ် ဦးဇင်းရယ် ” တဲ့။
ဟုတ်မှန်လှပေစွ။ သာသနာ့ဝန်ထမ်းသားရဟန်း၏ ဖခင်။ ရင်သွေးအရင်းအချာကို သာသနာတော်အား ပြတ်ပြတ်သားသားလှူဒါန်းခဲ့သော ဖခင်။ သူကိုယ်တိုင်ကတော့ ဖခင်တစ်ယောက်၏ သာသနာ့အမွေခံ အလှူအတွက် ပါရမီမြောက်သော လှူဖွယ်ဝတ္ထုပေတကား။ လူသားအရင်းအမြစ်(Human Resource)ဆိုသော စကားလုံးနှင့် မရင်းနှီးသော ကျေးလက်မှ ဖခင်သည် လူသားအရင်းအမြစ်အစစ်ဖြစ်သည့် သားတစ်ယောက်လုံးကို သာသနာတော်အတွက် ရက်ရက်ရောရောပေးလှူခဲ့ လေသည်တကား။
(၂)
ထိုကဲ့သို့သော ဖခင်တစ်ယောက်ကလည်း သာသနာ့သမိုင်းစာမျက်နှာတွင် အားကျဂုဏ်ယူဖွယ် လင်းလင်း ချင်းချင်းမှတ်တိုင်စိုက်ထူခဲ့ဖူးလေသည်ပဲ။ လူသားအရင်းအမြစ်အကြောင်း ကျယ်ကျယ်လောင်လောင် ပြောနေ ကြသည့် ရာစုသစ်ထက် စောစွာပင် အသောကမင်းဧကရာဇ်တို့ခေတ်ကလည်း လူသားအရင်းအမြစ်၏ တန်ဖိုးကို သိနားလည်ခဲ့ကြသည်။
အိန္ဒိယ၏ သမိုင်းအရှိန်အ၀ါကြီးမားသော အသောကဧကရာဇ်သည် အစဦးက အာဏာစက်ဘုန်း ဟုန်းဟုန်းတောက်ရေးတစ်ခုသာ ဦးတည်ချက်ရှိသည့် စစ်ဘုရင်တစ်ပါးအဖြစ် မဇ္ဈိမတိုက်ကြီးတစ်ခုလုံးကို သွေးညှီနံ့တို့ဖြင့် လိမ်းကျံပစ်ခဲ့သည်။ သွေးသားအရင်းအချာညီနောင်များ၏ အသက်အိုးအိမ်ကို ချေမှုန်းလျက် နိုင်ငံအာဏာကို ရယူကာ ရက်စက်မှုမှန်သမျှ၏ ပူလောင်သောပြယုဂ်ကြီးဖြစ်ခဲ့သည်။ တိုင်းနိုင်ငံ ပြည်ရွာများစွာကို ကျူးကျော် ဖျက်ဆီးကာ ပြည်သူတို့၏ မျက်ရည်ပြပွဲများကို ဖျော်ဖြေမှုတစ်ရပ်အဖြစ် ကြည့်ရက်နိုင်ခဲ့သည်။
သို့သော် အသောက၏ စိတ်နှလုံးတွင် ဖြူသောအရိပ်ကလေးရှိနေသေးသည်။ ထို့ကြောင့်ပင် ကလိင်္ဂစစ်ပွဲ၏ အနိဋ္ဌာရုံမြင်ကွင်းက အသောကကို ထိတ်ပြာသွားစေခဲ့သည်။ စစ်မြေပြင်လက်ကျန် မျက်ရည်၊နာကျင်မှုနှင့် အာဃာတတို့ လွှမ်းသောရှုခင်းများက အသောက၏ နှလုံးသားကို ဆောက်တည်ရာမဲ့သွားစေခဲ့သည်။သို့နှင့် ကျူးကျော်စစ်များကို ရပ်ပစ်လိုက်သည်။ သွေးစွန်းဓါးကို လွှတ်ချပစ်လိုက်သည်။ ထိုအချိန်မှာပင် ဗုဒ္ဓသာသနာပြု နိဂြောဓသာမဏေလေး၏ အဆုံးအမကို ခံယူခွင့်ရခဲ့ပြန်သည်။
အပ္ပမာဒတရား၏လင်းပွင့်မှုတို့ကို သိမ်းပိုက်မိသော အသောကဧကရာဇ်သည် သာသနာတော်၏ တန်ဖိုးကို သိ မြင်သွားခဲ့သည်။ ကိုယ်တော်တိုင် ခံစားခွင့်ရရှိသည့် ငြိမ်းအေးမှုဓမ္မသန္တရသကို အများပြည်သူတို့အား မျှဝေ လိုသောဆန္ဒတော်လည်း ကြီးထွားခဲ့လေသည်။ထို့ကြောင့်ပင် ဗုဒ္ဓအရှင်၏ အဆုံးအမကို အခြေခံကာ မောရိယ လက်နက်နိုင်ငံတော်ကို ဓမ္မနိုင်ငံတော်ကြီးအဖြစ်တည်ထောင်ရေးလမ်းစဉ်သစ်ဆီ ဦးတည်ခဲ့တော့သည်။
အသောကဧကရာဇ်၏ အမြင်တွင် ဗုဒ္ဓသာသနာတော်သည် ဗြဟ္မစိုရ်ထွန်းကားသော လူ့အဖွဲ့အစည်း ပေါ်ပေါက် ရေး၏ အခြေခံအဆောက်အဦဖြစ်သည်။ တိုင်းနိုင်ငံပြည်သူအားလုံး သာသနာတော်၏ အဆုံးအမကို ခံယူကျင့် သုံးကြလျှင် ဗြဟ္မစိုရ်တရားထွန်းကားပေလိမ့်မည်။ ဗြဟ္မစိုရ်လင်းပသော လူ့အဖွဲ့အစည်းတွင် ပဋိပက္ခ၊ ၀ိရောဓိနှင့် ငြင်းခုန်ရန်လိုမှုကင်းကာ ငြိမ်းချမ်းပျော်ရွှင် စည်ပင်သာယာရှိပေလိမ့်မည်ဟု အယူတော်ရှိလေသည်။
သို့နှင့် သာသနာတော်အဓွန့်ရှည်တည်တံရေးအတွက် ဘုန်းလက်ရုံးအာဏာအခွင့်အလမ်းတို့ကို အကျိုးရှိစွာ အသုံးပြုတော်မူခဲ့သည်။ ဗုဒ္ဓအရှင်၏ စကားတော်အစုဓမ္မက္ခန္ဓာပေါင်းရှစ်သောင်းလေးထောင်ကို ဂုဏ်ပြုပူဇော် သောအားဖြင့် သာသနာပြုကျောင်းတော်များ၊ ကုသိုလ်ပွားစီးရာစေတီပုထိုးများ၊ အများပြည်သူတည်းခိုရာ ဇရပ်တန်ဆောင်းများ ရေတွင်းရေကန်များဆောက်လုပ်တည်ထားရေးအတွက် ကုဋေပေါင်းများစွာ မြုတ်နှံသုံးစွဲခဲ့သည်။
ဓမ္မ၀ိနယပြန်တမ်းတော်များကို ကျောက်စာရေးထွင်းကာ တိုင်းသားပြည်သူတို့ တရားနည်းလမ်းကျနေထိုင် ကျင့်သုံးရေးဆော်သြတော်မူခဲ့သည်။
သာသနာတွင်းရှိအတုအယောင်ရဟန်းများကို အာဏာစက်ဖြင့် ဖယ်ရှားခဲ့သည်။ အသောကဧကရာဇ်၏ ထူးခြားသော ကုသိုလ်တော်အဖြစ် အရှင်မဟာမောဂ္ဂလိပုတ္တတိဿရဟန္တာကိုယ်တော်ကြီး၏ သြ၀ါဒကိုခံယူကာ ကျင်းပခဲ့သည့် ပါဋလိပုတ်စစ်တမ်းဟု ခေါ်ဆိုရမည့် တတိယသင်္ဂါယနာပွဲကြီးကို မြင်ရပေမည်။ ဘာသာခြား အယူဝါဒတို့ရောထွေးယှက်တင်ဖြစ်နေသည့် ပိဋကတ်တော်များကို ပြန်လည်စိစစ်မှတ်တမ်းတင်သည့်ပွဲကြီး ပင်ဖြစ်ပါသည်။
အသောကဧကရာဇ်အနေဖြင့် ပြုခဲ့သမျှသောကုသိုလ်တော်တို့ကို ပြန်လည်တွေးတောမိတိုင်း လက်ခမောင်း ခတ်မိသည်ချည်းပင်။ ဇမ္ဗူတလူ ကုသိုလ်တော်တို့ကား မှန်သည်။ သို့သော် ကွက်လပ်ကျန်နေပါသေးသည်။ သာသနာက အစစ်အမှန်လိုအပ်နေသည်ကား လူသားအရင်းအမြစ်(Human Resource) ပေတည်း။ လှူပေတော့ အသောက။
(၃)
အရှင်မောဂ္ဂလိပုတ္တတိဿထေရ်အား အသောကဧကရာဇ်က မေးခွန်းတစ်ခု လျှောက်ထားခဲ့သည်..။ သာသနာအတွက် ကြီးကျယ်ခမ်းနားသော အလှူများစွာကို လှူခဲ့ပြီးသည့်အတွက် သာသနာ့ဒါယကာအစစ်ဖြစ်ပါပြီလား..။ သာသနာ့အမွေခံသူဖြစ်ပါပြီလား..။
လူသားအရင်းအမြစ်၏ တန်ဖိုးကို မြင်သော မထေရ်မြတ်က '' မိမိ၏ ရင်၌ ဖြစ်သော သားသမီးဖြစ်စေ၊ ကိတ္တိမသားသမီးဖြစ်စေ သာသနာ့ဘောင်သို့ သွတ်သွင်းချီးမြှောက်လှူဒါန်းမှသာလျှင် သာသနာအရှည်တည်တံ့ရေးအတွက် ထူးကဲမွန်မြတ်သော သာသနာ့အမွေခံအလှူဖြစ်မည် ဟု ပြန်ကြားခဲ့သည်။
ကျောင်းကန်စေတီပုထိုးဆိုသည်မှာ ရာသီအပြောင်းအလဲတွင် ဟောင်းနွမ်းပြိုကျပျက်စီးသွားပေမည်။ ဓမ္မနှင့် ကင်းကွာသွားလျှင် ထိုအဆောက်အဦသာသနာသည် ပြတိုက်များသာ ဖြစ်သွားပေတော့မည်။
သို့နှင့် အသောကဧကရာဇ်က အိမ်ရှေ့ဥပရာဇာလောင်းလျာ သားတော်မဟိန္ဒမင်းသားကို ငဲ့စောင်းကြည့်မိသည်..။ ဖခင်၏ သဒ္ဓါတရားကို ငဲ့ကွက်၊ မိမိကိုယ်တိုင်၏ သံသရာထွက်လမ်းကိုလည်း မျှော်တွက်မိသော မင်းသားက မောရိယထီးနန်းကို ကျောခိုင်းကာ သာသနာပြုရဟန်းတစ်ပါးဖြစ်ခံယူခဲ့သည်..။ ကိုးတိုင်းကိုးဌာနသာသနာပြုလမ်းကြောင်းကို ဦးဆောင်ကြွတော်မူခဲ့သော ရဟန္တာမထေရ်မြတ်ကြီးအဖြစ်လည်း သာသနာ့စံတော်ဝင်တွင် ကမ္ပည်းဥဒါန်းတွင်ခဲ့သည်။
မိမိ၏ နန်းညွန့်နန်းလျာရင်သွေးအစစ်ကို သာသနာတော်ချစ်သောစိတ်ဖြင့် လှူဒါန်းခဲ့သော ဖခင်မြတ်တစ်ဦးကြောင့် ယနေ့ခေတ်ဗုဒ္ဓသာသနာ့ပထ၀ီသည် ဤမျှ ကျယ်ပြောကျယ်ဝနေခဲ့ခြင်းဖြစ်သည်..။
သူ့ဖခင်ကတော့ သာမန်တောင်သူလယ်သမားကြီးတစ်ဦးသာ ဖြစ်သည်..။ သို့သော် '' သီရိဓမ္မာသောကရာဇာ '' ဓမ္မတေးဂီတဖြင့် ယဉ်ပါးခဲ့လေဟန်ပင် သာသနာ့အမွေခံအိပ်မက်ကို မက်ခဲ့လေသည် ထင့် ။ သားလေးယောက်လုံးက သာသနာ့ဘောင်ဝင်ချင်သည် ဆိုသောခါ တစ်ယောက်ပြီး တစ်ယောက် ရှင်အဖြစ်သို့ သွတ်သွင်းပေးခဲ့သည်။ မိဘအမွေကို ဆက်ခံနိုင်အောင် အားကိုးနေရပြီဖြစ်သည့် သားအကြီးဆုံးကို သာသနာ့ဘောင်သို့ သွတ်သွင်းပေးခဲ့သောနေ့က ရွာအ၀င်လမ်းတွင် ဖခင် ငိုခဲ့သည် ဟု အမေပြောပြ၍ ပြန်သိရသည်။ ငါ့သားတွေတော့ သာသနာ့ဝန်ထမ်းကြီးတွေ ဖြစ်ကုန်ပေါ့ဗျား တဲ့။
လယ်ယာလုပ်ငန်းအတွက် အားဖြစ်လာမည့် သားများမရှိတော့သောအခါ လူမမယ်သမီးငယ်များနှင့် မိသားစုကို မျက်နှာမပျက် ရုန်းကန်ခဲ့သည်..။ သည်ကြားထဲ မိုးခေါင်းခြင်းနှင့် ဆိုရှယ်လစ်လမ်းစဉ်တို့ကလည်း ဖခင်၏ ချွေးများကို ညှစ်ထုတ်ကြပြန်သည်။
သူတို့ ငယ်စဉ်က ပိုင်ဆိုင်သော လယ်ယာကုန်းချောင်းများ တစ်စတစ်စ လုံးပါးပါးသွားသည်။ မည်သို့ဆိုစေ ဖခင်စိတ်မပျက်ခဲ့ပါ..။ ကိုယ်တော်တို့ စာကိုသာ ကြိုးစားကြ…။ သားလေးယောက်၏ ပရိယတ္တိပညာရေးစရိတ်အတွက်လည်း မျက်နှာမငယ်ရအောင် ထောက်ပံ့ခဲ့ကြရှာသေးသည်။ မိခင်နှင့် အမကြီးတို့၏ နားပေါက်ဟောင်းလောင်းများ၏ အဓိပ္ပါယ်ကို လွန်ခဲ့သော နှစ်များဆီကမှ သိရသည်..။ သူကတော့ ခပ်ပေပေဖြတ်သန်းတတ်သူပီပီ ခပ်နွမ်းနွမ်းနေရက်များကို ခပ်သောသောပင် ကျော်ဖတ်ပစ်ခဲ့သည်။
ဖြစ်ချင်တော့ သားများက တစ်ယောက်ပြီးတစ်ယောက် သာသနာတော်အတွက် ပါရမီနည်းကာ လောကီမြစ်ထဲ ပြန်ဆင်းသွားကြသည်..။ ထိုအချိန်များဆီက ဖခင်၏ ကြေကွဲမှုကို သူ ခံစားမိသည်။ နောက်ဆုံးကျန်သော သူ့ကို ဖခင်မော့ကြည့်သည်။
သည်တော့လည်း သူတစ်ယောက်တည်း ဖခင်၏ စိတ်ကို မြင်နေသည့်အလား တစ်ခါတစ်ရံ လောကီကို ညွတ်မိသည့်တိုင် သာသနာ့ဝန်ကို စွမ်းနိုင်သမျှ ကျေပွန်အောင် ထမ်းထားမိသည်။ သာသနာ့စာမျက်နှာတွင် အထိုက်အလျောက် ခြေဖျားစမ်းထောက်ကြည့်ကာ ဖခင်၏ စိတ်နှလုံးကို သွန်းလောင်းမိသည်..။ မိခင်ကတော့ မပျော်လည်း ထွက်ပေါ့ သားရယ် ဟု မကြာမကြာပြောတတ်သည်..။
လယ်သမားတစ်ဦး၏ သားမျှသာ ဖြစ်သော သူသည်လည်း ဧကရာဇ်မင်းမြတ်၏ သားရဟန်းခင်းထားခဲ့သော လမ်းမှုန်မှုန်ကို ဖုံနေအောင် လျှောက်ကြည့်ချင်ပါသေးသည်..။
မြို့ပြတွင် တစ်ခါတစ်ရံ '' အမေတွေ အဖေတွေ ရှိသေးတယ် '' ဟု သူပြောမိလျှင် အံ့သြဟန်ပြကြသော မျက်လုံးအချို့နှင့် ကြုံရဖူးသည်။ သာသနာ့ဝန်ထမ်းများသည် မိဘမဲ့သောသားများဟု ထင်မှတ်ထားသော ထိုမျက်လုံးများကို ဖတ်လိုက်ရသောအခါ သူကြေကွဲမိ၏။
သာသနာအတွက် အပျော်ကို၊ ဆန္ဒကို၊လောကီကို ကျောခိုင်းထားရသော ပုထုဇဉ်ရှင်ငယ်ရဟန်းငယ်တို့၏ ကိုယ်စား ထိရှစွာ ခံစားရလေသည်။ ရင်နှစ်သည်းချာသားကို ဥမမယ်ကလေးဘ၀မှ သာသနာအတွက် လက်လွှတ်လိုက်ရသော မိခင်ဖခင်တို့၏ စိတ်နှလုံးအတွက်လည်း အားနာမိရပြန်လေသည်။
မိဘမျက်နှာထက် သာသနာ့မျက်နှာက ကြီးသွားသော သားရဟန်းတို့၏ ဥပေက္ခာနှစ်ကာလများဆီက ပြန်လည်လာမည့် အိမ်ပြန်ချိန်ကို စောင့်မျှော်နေကြရှာလေသည့် မိခင်ဖခင်တို့ကို သူ စာနာတတ်လေပြီ..။ သူ အိမ်ပြန်ပါဦးမည်..။ အဖေလို့သာ ခေါ်ပါလေ ဟု ဆိုသော ဖခင်ကြီးကို အဖေ ဟု ခပ်ကျယ်ကျယ်လေး ခေါ်ပါဦးမည်..။
မျက်ရည်မှုံဝါးကြားက သားရဟန်းကို ရှိခိုးဦးချဖို့ ဖျင်ကြမ်းပုဝါလေး စမ်းရှာနေလေမည့် မိခင်ကြီး၏ ပုခုံးသားကို ဖွဖွလေး ပုတ်ကာ '' အမေ '' ဟုလည်း သူ ခေါ်ပါလေဦးမည်..။
ဓမ္မဂင်္ဂါ
(၁၃-၅-၂၀၁၁)
(လွန်ခဲ့သောနှစ်က စာရေးဆရာမ မေငြိမ်းအတွက် အကြွေးတင်ခဲ့သော စာ ဒီနေ့မှပဲ အပြီးသတ်နိုင်တော့သည်..။)
